Падзеі, факты, анонсы
Ручная касьба, футбол на балоце і майстар-класы: вядома праграма фестывалю "Спораўскія сенакосы"
Фота з архiва
23 ліпеня, Брэст /Кар. БЕЛТА/. У Бярозаўскім раёне 10 жніўня 17-ы раз правядуць экалагічны фестываль "Спораўскія сенакосы", паведаміў карэспандэнту БЕЛТА дырэктар рэспубліканскага біялагічнага заказніка "Спораўскі" Вадзім Пратасевіч.
Фестываль у вёсцы Высокае арганізуюць штогод. Традыцыйна гасцей збіраюць у другую суботу жніўня. "Правілы застаюцца нязменнымі з першага года існавання "Спораўскіх сенакосаў". Камандзе з двух чалавек трэба пракасіць паласу даўжынёй 100 м (па 1,5 м на кожнага). Пасля гэтага лепшыя ўдзельнікі выходзяць на асабістае першынство. Улічваюцца якасць і хуткасць касьбы. Вызначаюцца лепшыя у камандным і асабістым заліках. Будзе і чэмпіянат па футболе на балоце", - расказаў Вадзім Пратасевіч.
Заяўкі ад жадаючых арганізатары прымаюць да 3 жніўня. У чэмпіянаце па ручной касьбе можа прыняць удзел неабмежаваная колькасць каманд. Тэрыторыя дазваляе ў дастатку выдзеліць надзелы для касцоў. Паспрабаваць сябе ў гэтай справе могуць і мужчыны, і жанчыны. Такім чынам у заказніку захоўваюць спрадвечныя беларускія традыцыі. "Аўтэнтычнасць фестывалю ў тым, што людзі косяць ручнымі косамі. Такі інструмент трэба ўмець адкляпаць, навастрыць. Такіх кос і людзей, якія ўмеюць імі касіць, засталося вельмі мала, гэта прыцягвае ўвагу, у тым ліку моладзі. Ужо заявіліся тры маладзёжныя каманды", - заўважыў дырэктар заказніка. У тым ліку ўдзельнікі фестывалю ўносяць свой уклад у падтрыманне балот у натуральным стане.
Спаборніцтвы па футболе на балоце ў "Спораўскім" правядуць дзясяты раз. З кожным годам турнір набірае папулярнасць. За званне мацнейшых у валоданні мячом прапануюць пазмагацца максімум 12 камандам. Такі матч доўжыцца два перыяды па 15 мінут. У якасці формы рэкамендуюць выкарыстоўваць адзенне, якое будзе не шкада запэцкаць.
На фестывалі будуць і іншыя забавы. У прыватнасці, наведвальнікам прапануюць наведаць майстар-класы па маляванні і сплаве на байдарках, пагуляць у настольныя гульні, убачыць работу станцыі кальцавання птушак. Асобныя пляцоўкі прадугледжаны для дзяцей. Разгорнецца выязны гандаль. Гасцей будуць забаўляць творчыя калектывы Бярозаўскага раёна і папулярныя беларускія выканаўцы.
Галоўная мэта "Спораўскіх сенакосаў" - прыцягнуць увагу да праблемы зарастання балот. На Спораўскім балоце жыве вяртлявая чарацянка, занесеная ў Чырвоную кнігу. Калі балота зарастае, рэдкая птушка перастае гнездавацца ў гэтай мясцовасці. Таму ўдзельнікі фестывалю ўносяць уклад у захаванне прыроды.
версія для друку
зрабіць стартавай
дабавіць у выбранае