Падзеі, факты, анонсы
Пленэр "Віцебск - горад Марка Шагала" сабраў больш за сотню юных мастакоў з Беларусі, Расіі і Казахстана
22 чэрвеня, Віцебск /Кацярына Князева - БЕЛТА/. Віцебск у гэтыя дні прымае ў сябе больш за 100 юных мастакоў з Беларусі, Расіі і Казахстана на традыцыйным міжнародным пленэры "Віцебск - горад Марка Шагала", паведамілі карэспандэнту БЕЛТА ў турфірме "Ілва", якая з'яўляецца галоўным арганізатарам падзеі.
Вучні розных школ мастацтваў з Масквы, Жалезнагорска, Лесасібірска (Расія), Тэміртау (Казахстан), а таксама Бабруйска на працягу мінулых выхадных заязджалі ў Віцебск, дзе іх чакалі цікавыя экскурсіі і наведванне музеяў. Цяпер жа юныя мастакі пачалі асноўную частку праграмы - конкурс-пленэр, які штогод праходзіць у паўночнай сталіцы Беларусі з 2003 года.
"Некаторыя, напрыклад масквічы, прыязджаюць ужо другі раз - яны ў захапленні ад Віцебска. Цяпер юнакі малююць гарадскія пейзажы ў цэнтры Віцебска і іншых яго кутках. А пасля з 25 чэрвеня работы будуць экспанавацца ў выставачнай зале цэнтра эстэтычнага выхавання "Маладзік" пры школе мастацтваў нумар 3 - гэта будзе своеасаблівы падарунак гораду. Конкурс жа будзе праводзіцца сярод дамашніх работ юных мастакоў, якія яны прывезлі з сабой", - растлумачыла менеджар па спецпраектах "Ілвы" Алена Паднябеснава.
Удзельнікі пленэру таксама маюць магчымасць павучыцца ў знакамітых віцебскіх мастакоў на майстар-класах. Напрыклад, 23 чэрвеня запланавана паездка ў музей-сядзібу Ільі Рэпіна "Здраўнёва", дзе свае ўрокі дасць Фелікс Гумен. На наступны дзень юныя мастакі накіруюцца на экскурсію ў Полацк, дзе таксама нямала мясцін, вартых пэндзля таленавітых юных мастакоў.
версія для друку
зрабіць стартавай
дабавіць у выбранае