Падзеі, факты, анонсы

14 верасня, Мінск /Кар. БЕЛТА/. Лідару зборнай Беларусі па сучасным пяцібор'і Настассі Пракапенка ўручана бронзавая ўзнагарода Алімпіяды 2008 года ў Пекіне, паведамілі БЕЛТА ў прэс-службе НАК Беларусі.

У сталіцы Кітая дзесяць гадоў таму беларуска заняла чацвёртае месца, уступіўшы трэцяе месца на п'едэстале ўкраінцы Вікторыі Церашчук. Аднак допінг-проба ўкраінскай спартсменкі пасля пераправеркі аналізаў дала станоўчы вынік на анабалічны стэроід турынабол.

У адпаведнасці з рашэннем Міжнароднага алімпійскага камітэта (МАК) узнагарода перададзена прадстаўніцы Беларусі Настассі Пракапенка.

Уручэнне медаля адбылося ў ходзе чэмпіянату свету па сучасным пяцібор'і ў Мехіка (Мексіка), дзе спартсменка заваявала золата ў асабістым заліку і жаночай эстафеце.