Падзеі, факты, анонсы

12 Ліс 2022

Мінскі міжнародны кінафестываль "Лістапад" у 2018-2022 гадах

XXV Мінскі міжнародны кінафестываль "Лістапад"

Свой чвэрцьвекавы юбілей "Лістапад" прысвяціў вядомаму рэжысёру і аднаму з самых любімых аўтараў кінафестывалю Кіры Муратавай. За аснову лозунга "Лістапада-2018" узяты яе аднайменны фільм "Пазнаючы белы свет".

У XXV Мінскім міжнародным кінафестывалі "Лістапад" прынялі ўдзел 167 карцін з 48 краін, у тым ліку дэбютантаў – ПАР і Кеніі. Галоўны прыз кінафоруму – "Золата Лiстапада" – атрымала стужка "Мне пляваць, калі мы ўвойдзем у гісторыю як варвары" рэжысёра Раду Жудэ (Румынія, Чэхія, Францыя, Балгарыя, Германія).

Мінскі міжнародны кінафестываль "Лістапад"-2019

"Да радасці" заклікалі ўсіх аматараў кіно, якія былі з 1 па 8 лістапада ў Мінску, арганізатары ММКФ-2019. Менавіта пад такім слоганам – адсылкай да аднайменнага фільма шведскага рэжысёра Інгмара Бергмана – у беларускай сталіцы прайшоў ужо 26-ы "Лістапад". У аснове візуальнага афармлення сёлетняга форуму – дарога, як увасабленне "падарожжа ў свет нашых пачуццяў, нашага розуму, што дае магчымасць нам крыху больш зразумець сябе" і тым самым адчуць радасць.

Афіша "Лістапада"-2019 – гэта пярэсты калейдаскоп кінастужак і жанраў: драмы, камедыі, меладрамы, баевікі, нацыянальныя блокбастары…

У асноўным конкурсе ігравога кіно былі паказаны 12 фільмаў, і кожны, паводле слоў праграмнага дырэктара фестывалю вядомага кінакрытыка Ігара Сукманава, заклікае да радасці: яны аб тым, як зразумець гэту вышэйшую радасць і прыйсці да катарсісу.

Конкурс дакументальнага кіно сабраў 13 работ. Конкурс "Маладосць на маршы" аб’яднаў работы аўтараў-дэбютантаў маладога кіно з розных краін: гэта 12 карцін, "якія паказваюць суровую рэальнасць і спробы выйсця з яе".

Нацыянальны конкурс, які адбыўся шосты раз, прадставіў 5 работ ігравога кіно, 9 дакументальных фільмаў і 6 анімацыйных стужак. Многія з іх ужо адзначаны іншымі міжнароднымі фестывалямі, напрыклад, "Трэнер" рэжысёра Вольгі Абрамчык, "Гульня ў класікі" Дар’і Дзямура, "Адна сям’я" Наталлі Жамойдзік, "Хронікі ртуці" Сашы Кулака і Бена Геза, Summa Андрэя Куцілы, "Перазімаваць" Евы-Кацярыны Махавай, "Мая бабуля з Марса" Аляксандра Міхалковіча, "Вялікае падарожжа князя Мікалая Хрыстафора Радзівіла Сіроткі" Юрыя Цімафеева, "Чыстае мастацтва" Максіма Шведа.

У праграме фільмаў для дзіцячай і юнацкай аўдыторыі "Лістападзік", паказы якіх прайшлі з 2 па 5 лістапада, прадставілі 8 карцін.

Акрамя таго, фестывальны тыдзень падарыў вялікую колькасць кінастужак, якія спаборнічалі не за ўзнагароды, а за сэрцы гледачоў. На шасці секцыях пазаконкурснай праграмы ігравога кіно – "Спецыяльныя паказы", "Майстар-клас", "Ільвы, мядзведзі, пальмавыя галінкі", "Палкасць ночы", "Аднойчы на Усходзе", "Расійскія прэм’еры" – паказалі 20 фільмаў. Яны створаны ў Канадзе, Беларусі, Філіпінах, Францыі, Кітаі, Японіі, Бельгіі, Нарвегіі, Германіі, Мексіцы, Іспаніі, Расіі і іншых краінах. Дакументальнае кіно па-за конкурсу было прадстаўлена 26 стужкамі, якія падзялілі на 8 секцый. Упершыню з’явілася праграма "Кінамова. Іншы сінтаксіс", якая аб’яднала дакументальныя і ігравыя карціны, прысвечаныя такім тэмам як развіццё кінамовы, пошук рэжысёраў, а таксама драматургія і праблематыка кіно.

Мінскі міжнародны кінафестываль "Лістапад"-2020

XXVII Мінскі міжнародны кінафестываль "Лістапад" пройдзе з 6 па 13 лістапада пад слоганам "Магія вобраза", які звяртаецца да ўнікальнай прыроды кіно. Аднак форум адменены. "У сувязі з неспрыяльнай эпідэміялагічнай сітуацыяй аргкамітэтам прынята рашэнне аб адмене ў 2020 годзе ўсіх мерапрыемстваў XXVII Мінскага міжнароднага кінафестывалю" Лістапад ", – гаворыцца ў паведамленні.