Падзеі, факты, анонсы

7 лютага, Брэст /Аляўціна Чарнаволава - БЕЛТА/. У Брэсце восенню 2018 года пройдзе чэмпіянат Еўропы па акадэмічным веславанні сярод спартсменаў да 23 гадоў, паведаміў карэспандэнту БЕЛТА дырэктар Брэсцкага абласнога цэнтра алімпійскага рэзерву па веславанні Павел Дзенісюк.

У Еўрапейскую федэрацыю веславання заяўку беларускі бок накіраваў вясной 2016 года. На правядзенне маладзёжнага кантынентальнага першынства прэтэндавалі таксама гарады Чэхіі, Францыі і Літвы. Экспертная камісія высока ацаніла прэзентацыю Брэста і прадставіла яму права на правядзенне чэмпіянату Еўропы U-23 у верасні 2018 года.

"Гэта камерцыйна выгаднае мерапрыемства, і мы гатовы да яго правядзення. Уся неабходная інфраструктура ёсць. У Брэсцкага вяслярнага канала цудоўныя водзывы міжнародных спецыялістаў. У горадзе дастаткова месц для харчавання і размяшчэння каманд і балельшчыкаў. Акрамя таго, плануем прапаноўваць спартсменам экскурсіі па Брэсце, у Белавежскую пушчу, каб яны атрымалі задавальненне не толькі ад спаборніцтваў, але і ад знаходжання ў краіне", - адзначыў Павел Дзенісюк.

Вопыт правядзення такіх турніраў у Брэста ёсць. У 2009 годзе прыгранічны горад прыняў чэмпіянат Еўропы па веславанні сярод дарослых спартсменаў. На год пазней у абласным цэнтры адбылося сусветнае першынство сярод моладзі. Акрамя таго, у ліпені бягучага года ў абласным цэнтры пройдуць Балтыйскія гульні, у праграму якіх уваходзяць вяслярныя віды спорту. Восенню на мясцовым канале будзе разыграны Кубак Балтыкі па акадэмічным веславанні. Гэтыя старты стануць этапам падрыхтоўкі да маладзёжнага чэмпіянату Еўропы-2018.