Падзеі, факты, анонсы

Маладыя оперныя салісты выканаюць сусветныя шэдэўры ў Белдзяржфілармоніі 16 верасня

Фота з архiва

12 верасня, Мінск /Кар. БЕЛТА/. Маладыя оперныя салісты выканаюць шэдэўры сусветнай оперы ў праграме "Зоркі беларускай оперы на сцэне філармоніі" Белдзяржфілармоніі 16 верасня, паведамілі БЕЛТА ва ўстанове.

"У гэтым годзе аўтар і мастацкі кіраўнік праекта "Музычная гасцёўня" піяністка Таццяна Старчанка прадстаўляе праграму з удзелам маладых салістаў беларускай оперы. У малой зале імя Рыгора Шырмы выступяць уладальнікі цудоўных галасоў, выканаўцы вядучых партый у спектаклях Вялікага тэатра Беларусі лаўрэаты міжнародных конкурсаў Марта Данусевіч, Тарас Прысяжнюк і Аляксандр Міхнюк", - расказалі ў Белдзяржфілармоніі.

У першым аддзяленні канцэрта прагучаць Раманс Немарына з оперы Гаэтана Даніцэці "Любоўны напітак", Песенька Герцага з оперы "Рыгалета" і Застольная з оперы "Травіята" Джузэпэ Вердзі, а таксама арыі з опер Пятра Чайкоўскага, Рыхарда Вагнера, Джакама Пучыні. "Гэта сапраўдныя шэдэўры сусветнага опернага рэпертуару. Другое аддзяленне канцэрта будзе аддадзена жамчужынам рускай камерна-вакальнай лірыкі: рамансам Міхаіла Глінкі, Пятра Чайкоўскага, Георгія Свірыдава і Леаніда Дзясятнікава", - адзначылі ва ўстанове.

Музычная праграма адбудзецца 16 верасня ў 19.00 у малой зале імя Рыгора Шырмы Белдзяржфілармоніі.

версія для друку

зрабіць стартавай

дабавіць у выбранае