Падзеі, факты, анонсы
Майстар-класы, канцэрты ў цэхах і свае адметнасці. "Марафон адзінства" прымаюць Баранавічы
13 снежня, Брэст /Кар. БЕЛТА/. Першы дзень "Марафону адзінства" стартуе сёння ў Баранавічах, паведамляе БЕЛТА са спасылкай на арганізатараў.
Баранавічы 13 і 14 снежня гасцінна сустракаюць рэспубліканскую грамадска-культурную акцыю "Марафон адзінства". Гэта ўжо дзявяты пункт у яго маршруце: "Марафон" пачаў свой шлях з Маладзечна, пабываў ужо у Гомелі, Жлобіне, Бабруйску, Магілёве, Віцебску і Оршы. У Брэсцкай вобласці акцыю прымае ўжо другі горад, першым быў Пінск.
Гасцей пазнаёмяць з Баранавічамі і іх адметнасцямі. Для блогераў, творчых калектываў з Магілёўскай і Мінскай абласцей арганізуюць экскурсіі. У іх будзе магчымасць убачыць дзіцячы тэхнапарк роўных магчымасцей, які размяшчаецца ў сценах сярэдняй школы нумар 1 імя С.І.Грыцаўца. Дарэчы, там жа створаны ўнікальны Музей народнага адзінства. Гасцінна прымуць ТАА "ЭлегмаІнвест", Баранавіцкі хлебазавод і ААТ "Гандальмаш".
Праект "Адну справу робім!" аб'яднае прадпрыемствы, якія працуюць у партнёрстве адзін з адным. Сутнасць - у адлюстраванні вытворчага адзінства. Такіх сустрэч у Баранавічах запланавана дзве. Работнікі Баранавіцкага аўтаагрэгатнага завода пазнаёмяцца з калектывамі жодзінскага Кавальскага завода цяжкіх штамповак і ваўкавыскага "ВаўМета". Гатовы да прыёму гасцей і Баранавіцкі станкабудаўнічы завод. Яго наведаюць прадстаўнікі барысаўскага "Экрана", Рэчыцкага метызнага завода, мінскіх "Эквіпмент Рэнт Інвестмент" і "Віток".
"Марафон адзінства" разам з праектам "Разам працуем, разам спяваем!" прынясе натхненне ў цэхі Баранавіцкага вытворчага баваўнянага аб'яднання, філіял Баранавіцкага камбіната ЖБК ААТ "Крычаўцэментнашыфер" і Лакаматыўнае дэпо Баранавічы. Артысты сваімі выступленнямі зарадзяць пазітывам работнікаў, пагутараць у простай абстаноўцы.
Шмат цікавага прызапашана для школьнікаў і студэнтаў. У расклад Баранавіцкага дзяржаўнага каледжа тэхналогіі і дызайну і Баранавіцкага дзяржаўнага каледжа лёгкай прамысловасці імя В.Я.Чарнышова дабавіцца "НЕсумная НЕлекцыя". Навучэнцы ў лёгкай атмасферы змогуць пагутарыць з вядомымі спікерамі. Узаемадзеянне будзе праходзіць з элементамі інтэрактыву. Самыя актыўныя ўдзельнікі сустрэчы змогуць атрымаць прызы, у тым ліку білеты на канцэрт "Час выбраў нас".
Плануецца па-сапраўднаму ўнікальная падзея ў Палацы дзіцячай творчасці. Для юных танцораў правядуць майстар-клас па балеце артысты Вялікага тэатра Беларусі, для выхаванцаў-музыкантаў - артысты аркестра Вялікага тэатра Беларусі.
Акрамя таго, у Баранавіцкім дзяржуніверсітэце адбудзецца адкрытая размова "Маё жыццё. Мой шлях. Мой Прэзідэнт". Студэнты ВНУ і прадстаўнікі грамадскасці сустрэнуцца з кандыдатам сацыялагічных навук, дацэнтам, кіраўніком прадстаўніцтва Пастаяннага камітэта Саюзнай дзяржавы ў Мінску Мар'янай Шчоткінай.
Выстаўка Нацыянальнай акадэміі навук "Погляд за гарызонт" разгорнецца на тэрыторыі Баранавіцкага дзяржаўнага ўніверсітэта (вул. Паркавая, 62). Наведаць яе можна будзе на працягу двух дзён. Наведвальнікі змогуць даведацца пра лепшыя распрацоўкі беларускай навукі па розных напрамках. Ключавыя тэматыкі - космас, беспілотныя сістэмы, мікраэлектроніка, найноўшыя матэрыялы, біятэхналогіі, функцыянальнае харчаванне, даследаванні Антарктыды, гісторыя і археалогія.
БЕЛТА прадставіць у Баранавічах тры экспазіцыі. Праект "Беларусь. Узлёт", які адлюстроўвае шлях краіны, размесціцца на тэрыторыі гандлёва-выставачнага комплексу "Свяцілаўскі". Выставу "Паралельныя светы" можна будзе паглядзець у зале білетных кас чыгуначнага вакзала Баранавічы-Палескія. Гэта праект, у якім шлях краіны за апошнія 30 гадоў незалежнасці паказаны з пункту гледжання двух светаў. Адзін з іх - шлях міру і стварэння, дасягненняў. Другі - "паралельны" - напоўнены нянавісцю і дэградацыяй. Выстава "Суверэнная Беларусь" разгорнецца ў будынку лядовай арэны. Яна наглядна паказвае дасягненні нашай краіны ў палітычнай, грамадскай, эканамічнай сферах.
Насычаная праграма і ў суботу, 14 снежня, жыхароў Баранавіч і гасцей горада запрашаюць наведаць пляцоўку каля Лядовага палаца. Абяцаюць, што пачастункі і забавы будуць на любы густ і ўзрост. На гэтай лакацыі будзе працаваць комплекс фуд-тракаў, свае паслугі прапануюць рознічны гандаль і пункты грамадскага харчавання, у тым ліку будуць прадстаўлены вядучыя прадпрыемствы Брэсцкай вобласці. Выдасца рэдкая магчымасць убачыць гоначны аўтамабіль МАЗ і сустрэцца з камандай "МАЗ-СПОРТаўта". У 10.00 адкрыецца для наведвальнікаў перасовачная экспазіцыя Беларускага дзяржаўнага музея гісторыі Вялікай Айчыннай вайны. А ў 10.30 на пляцоўцы каля Лядовага палаца дадуць старт гарадскому квесту "Гэта ўсё маё роднае" ад БРСМ. Яго прызёры атрымаюць прызы і білеты на канцэрт "Час выбраў нас".
Дарэчы, на памяць гораду аб марафоне застанецца мурал "Будучыня Беларусі ў тваіх руках". Ён нанесены на фасад аднаго з дамоў на вуліцы Кірава.
Расклад вакзала чыгуначнай станцыі Баранавічы-Палескія дапоўніцца "Знакавай сустрэчай". У кожным горадзе, дзе рабіў прыпынак "Марафон адзінства", арганізоўваюць такі арыгінальны фармат стасункаў з вядомымі людзьмі. У Баранавічах чакаюць міністра інфармацыі Марата Маркава, палітычнага аглядальніка АНТ Ігара Тура, галоўнага рэдактара "Альфа-Радыё" Вадзіма Шэпета.
У канцэрце "Час выбраў нас" у Баранавічах прымуць удзел аматарскія і прафесійныя калектывы з усіх куткоў Брэсцкай вобласці, яркія творчыя нумары падораць артысты з Магілёўскай і Мінскай абласцей. Удзельнікамі гала-канцэрта стануць любімыя беларускія выканаўцы.
версія для друку
зрабіць стартавай
дабавіць у выбранае