Падзеі, факты, анонсы
Літаратурную спадчыну Купалы і Коласа прадставіць выстаўка "Алмазы беларускай літаратуры"
24 мая, Мінск /Кар. БЕЛТА/. Унікальныя дакументы ўпершыню прадставяць на выстаўцы "Алмазы беларускай літаратуры", прымеркаванай да 135-годдзя з дня нараджэння народных паэтаў Янкі Купалы і Якуба Коласа, у Нацыянальнай бібліятэцы Беларусі, паведамілі карэспандэнту БЕЛТА ў НББ.
Экспазіцыя выстаўкі, якая адкрыецца 25 мая, пазнаёміць наведвальнікаў з літаратурнай спадчынай народных паэтаў: прыжыццёвымі і сучаснымі выданнямі твораў, матэрыяламі канферэнцый, зборнікамі артыкулаў аўтарытэтных літаратуразнаўцаў, выданнямі па гісторыі беларускай літаратуры, дзе з пазіцыі сучаснасці ацэньваецца спадчына паэтаў, раскрываецца яе значэнне ў далейшым станаўленні мастацтва слова.
Нацыянальны архіў Рэспублікі Беларусь упершыню прадставіць шэраг унікальных дакументаў - асабістыя справы, рукапісы з аўтографамі пісьменнікаў, пасведчанні аб прысуджэнні ўзнагарод і іншыя архіўныя дакументы.
Да двайнога юбілею класікаў беларускай літаратуры Нацыянальная бібліятэка Беларусі распрацавала тэматычныя экскурсіі з цыкла "Праслаўленыя імёны Айчыны".
Імёны Купалы і Коласа ў нашым уяўленні заўсёды побач. І не толькі побач адно з адным, але перш за ўсё - побач з народам. Яны, сапраўды, пачатак усіх пачаткаў у беларускай культуры, літаратуры і мастацтве. Спадчына пісьменнікаў узнімае і прадстаўляе культуру роднай краіны на міжнароднай арэне: іх творы не толькі ўвайшлі ў залаты фонд беларускай літаратуры, але вядомыя і любімыя далёка за мяжой. Дзякуючы свайму таленту паэты змаглі на ўвесь голас, хоць і кожны па-свойму, расказаць свету пра Беларусь і яе праве заняць
"свой пачэсны пасад між народамі".Юбілейная экспазіцыя "Алмазы беларускай літаратуры" будзе працаваць да 30 снежня бягучага года. Арганізатарамі выстаўкі з'яўляюцца Нацыянальная бібліятэка Беларусі і Нацыянальны архіў Рэспублікі Беларусь.
версія для друку
зрабіць стартавай
дабавіць у выбранае