Падзеі, факты, анонсы
Ілья Івашка і Адрыян Унгур адкрыюць матч Кубка Дэвіса паміж тэнісістамі Беларусі і Румыніі
2 лютага, Мінск /Кар. БЕЛТА/. У Мінску сёння адбылася жараб'ёўка матчу першага круга I групы Еўра-Афрыканскай зоны Кубка Дэвіса паміж тэнісістамі Беларусі і Румыніі, перадае карэспандэнт БЕЛТА.
У першы гульнявы дзень 3 лютага ў 11.00 матч адкрыюць першы нумар беларускай зборнай Ілья Івашка (175-е месца ў сусветным рэйтынгу) і другая ракетка румынскай каманды Адрыян Унгур (313). Услед за імі на корт мінскага Палаца тэніса выйдуць Ягор Герасімаў (341) і Марыус Копіл (129).
4 лютага адбудзецца парная сустрэча, у якой за Беларусь згуляюць Максім Мірны (25-ы нумар парнага рэйтынгу) і Ягор Герасімаў. Іх сапернікамі будуць былы партнёр Мірнага Хорыя Тэкау (18) і Мікалай Фрунза (524). Пачатак парнай гульні ў 13.00.
5 лютага адбудуцца яшчэ два адзіночныя паядынкі: Івашка - Копіл, Герасімаў - Унгур.
Па рэгламенце Кубка Дэвіса, капітаны каманд Уладзімір Валчкоў і Андрэй Павел пасля першага гульнявога дня могуць правесці замены.
Раней у розыгрышы Кубка Дэвіса беларускія і румынскія тэнісісты сустракаліся толькі аднойчы - у 2005 годзе беларусы ўступілі ў гасцях з лікам 2:3. Цяпер зборная Беларусі займае 38-е месца ў камандным рэйтынгу Кубка Дэвіса, румыны знаходзяцца на 31-й пазіцыі.
Пераможца матчу Беларусь - Румынія ў наступным раўндзе ў верасні згуляе з камандай Аўстрыі.
версія для друку
зрабіць стартавай
дабавіць у выбранае