Падзеі, факты, анонсы

"Лiстапад": спецыяльны прыз Прэзідэнта Беларусі прысуджаны якуцкаму рэжысёру Міхаілу Лукачэўскаму

8 лістапада, Мінск /Кар. БЕЛТА/. Спецыяльны прыз Прэзідэнта Беларусі "За гуманізм і духоўнасць у кіно" прысуджаны кінарэжысёру - пастаноўшчыку фільма "Там, дзе танцуюць стэрхі" Міхаілу Лукачэўскаму (Якуція), перадае карэспандэнт БЕЛТА з цырымоніі закрыцця XXХ Мінскага міжнароднага кінафестывалю "Лістапад".

Узнагароду ўручыў намеснік прэм'ер-міністра Беларусі Ігар Петрышэнка. Ён адзначыў, што фестывальны тыдзень праляцеў вельмі хутка, і дзякуючы яму былі адкрыты новыя імёны рэжысёраў, сцэнарыстаў, аператараў і ўсіх тых, хто робіць сапраўднае кіно. Ігар Петрышэнка падзякаваў арганізатарам свята і гасцям, якія правялі цудоўныя майстар-класы, сустрэліся з беларускім гледачом і творчай моладдзю. На яго думку, гэта сапраўды паслужыла пашырэнню дружнай кінематаграфічнай сям'і.

Фільм "Там, дзе танцуюць стэрхі" ўвайшоў у праграму асноўнага конкурсу ігравых фільмаў. У аснове сюжэта - аўтабіяграфічная аповесць "Бег за вясёлкай" якуцкага пісьменніка і арнітолага Івана Дзячкоўскага. Падзеі фільма разгортваюцца ў самых прыгожых пейзажах Якуціі ў 1970-я гады. Якуцкая казка таксама стала ўладальнікам Гран-пры VIII Арктычнага кінафестывалю, а васьмігадовы выканаўца галоўнай ролі Міша Сляпцоў атрымаў спецпрыз "За лепшую ролю".

Маленькі Ваня вяртаецца дадому пасля доўгага лячэння і сустракаецца з маці праз 10 гадоў, але сямейная ідылія доўжыцца нядоўга. Пасля страты самага дарагога чалавека адважны Ваня спрабуе зрабіць немагчымае, каб убачыць маму і знайсці гармонію. Якуцкае павер'е гаворыць, што чалавек, які ўбачыў танец стэрхаў - белых жураўлёў - у небе, назаўсёды знаходзіць шчасце і ўнутраны спакой. Ваня верыць, што абавязкова ўбачыць гэта таінства.

Атрымаў прыз прадзюсар і аператар фільма Сямён Аманатаў. Ён падзякаваў за высокую ацэнку іх работы і адзначыў, што фестываль быў арганізаваны на вышэйшым узроўні.

версія для друку

зрабіць стартавай

дабавіць у выбранае