Падзеі, факты, анонсы

Каляндар падзей у Беларусі: ЛЮТЫ 2024

Выстава ''Свята ў вялікім горадзе: Новы год у савецкім стылі''

Музей гісторыі сталіцы запрашае адправіцца ў Мінск другой паловы ХХ стагоддзя і даведацца, як тады святкавалі Новы год. Інтэр'ер сталічнай кватэры 1950-х, дамашняя атмасфера і гарадскія прасторы ўзноўлены з дапамогай інсталяцый-фотазон з прадметаў побыту, жывапісных і графічных твораў, калекцый паштовак, ёлачных упрыгожанняў 1940–1980-х. Гарадскія пейзажы, выдатныя мясціны, утульныя дворыкі прадстаўлены на палотнах жывапісцаў – Васіля Сумарава, Віктара Яўсеева, Барыса Аракчэева, а дапаўняюць экспазіцыю акварэлі, літаграфіі і лінагравюры такіх аўтараў, як Рыгор Віткоўскі, Анатоль Тычына, Сямён Герус, Іван Пратасеня.

Калі: 7 снежня 2023 – 4 лютага 2024
Дзе: выставачная зала Музея гісторыі горада Мінска, вул. Ракаўская, 17, Мінск

"Навагоднія цацкі, свечкі і хлапушкі..." у палацы Румянцавых і Паскевічаў

Святочны настрой наведвальнікам гомельскага палаца Румянцавых і Паскевічаў будуць дарыць "Навагоднія цацкі, свечкі і хлапушкі...". Гэта мініяцюрны зімовы свет, героямі якога з'яўляюцца фарфоравыя дзеткі, якія катаюцца на лыжах і каньках па пушыстых снежных узгорках, забаўныя чалавечкі, прыбраныя паненкі, лясныя звяркі і дзіўныя насельнікі марскіх глыбінь, акружаныя садам з ззяючых агародніны, фруктаў, кветак і, вядома ж, шароў розных форм і памераў. Экспанаты выставы – навагоднія цацкі 1930-1980-х гадоў з фондаў палаца-музея, вырабленыя з такіх матэрыялаў як шкло, кардон, дрэва, пластык, вата, фольга…

Калі: з 21 снежня 2023
Дзе: Палац Румянцавых і Паскевічаў, пл. Леніна, 4, Гомель

Выстава "Рэтрафотатэхніка" ў Мастацкай галерэі Міхаіла Савіцкага

За сваю 200-гадовую гісторыю фотаапарат прайшоў шлях ад грувасткай камеры-абскуры да ўбудаваных у смартфоны фотакамер. Наведвальнікі выставы змогуць прасачыць асноўныя вехі ў гісторыі фотамастацтва, паглыбіцца ў працэс стварэння фатаграфіі і зразумець прынцыпы работы фотаапаратаў розных канструкцый. У экспазіцыі прадстаўлены розныя мадэлі фотатэхнікі, самыя раннія з якіх датуюцца першым дзесяцігоддзем ХХ ст. (стэрэафотаапарат Le Glyphoscope, 1905 г.), а самыя познія – канцом ХХ ст. Сярод прадметаў можна ўбачыць рэдкія і ўнікальныя ўзоры – праекціровачныя мадэлі фотаапаратаў "Зеніт" 1980-х гадоў, стэрэафотаапараты для здымкі трохмерных выяў, мікрафотаапараты…

Калі: 17 студзеня – 7 красавіка
Дзе: Мастацкая галерэя Міхаіла Савіцкага, пл. Свабоды, 15, Мінск

Праект "НейраБеларусь" у Мінску

Адна з самых інавацыйных мастацкіх выстаў – "НейраБеларусь" – дэманструе бачанне нашай краіны вачамі штучнага інтэлекту. У экспазіцыі – больш за 90 работ, якія створаны нейрасеткамі і паказваюць беларускую гісторыю, міфалогію, архітэктуру, прыроду, кухню...  Кульмінацыяй праекта з'яўляецца імерсіўны фільм "Лічбавая эвалюцыя", які ўяўляе сабой пераасэнсаванне свету ідэй і свету матэрыі, вольнае мастацкае разважанне наконт развіцця і эвалюцыі. У займальнай форме азнаёміцца з выставай можна праз тэматычны квест, а таксама падкаст у смартфоне.

Калі: 18 студзеня – 3 сакавіка
Дзе: галерэя FARBA, пл. Свабоды, 8, Мінск

Фестываль праваслаўных песнапенняў "Каложскі Дабравест"-2024

"Каложскі Дабравест", адроджаны ў 2002-м у гонар 10-годдзя Гродзенскай епархіі, праводзіцца паміж святам Стрэчання і пачаткам Вялікага посту. На працягу месяца дамы культуры становяцца цэнтрамі харавой музыкі і ў цэлым праваслаўнага мастацтва. Удзел у фестывалі прымаюць больш за 90 прыходскіх калектываў, сярод якіх вялікія хары гарадскіх храмаў, камерныя ансамблі вясковых цэркваў, свецкія калектывы. Выступленні суправаджаюцца тэатральнымі пастаноўкамі выхаванцаў нядзельных школ, літаратурнымі прэзентацыямі, фотавыставамі і выставамі вышытых абразоў. Завершыцца фестываль 18 лютага гала-канцэртам і цырымоніяй узнагароджвання лаўрэатаў праваслаўнага форуму ў гродзенскім Свята-Пакроўскім кафедральным саборы.

Калі: 21 студзеня – 18 лютага
Дзе: Вялікая Бераставіца, Зэльва, Шчучын, Скідзель, Гродна

Фотавыстава "Нябачныя героі" ў Нацыянальнай бібліятэцы Беларусі

"Нябачныя героі" – гэта праект, прысвечаны юным пацыентам Беларускага дзіцячага хоспіса, створаны дзякуючы супрацоўніцтву валанцёра і фатографа Ксеніі Ляговіч і супрацоўніка хоспіса Ульяны Казакевіч. Падапечныя паўстаюць у вобразах беларускіх міфічных персанажаў, герояў беларускіх казак, паказваючы гледачам, што жыццё – гэта цуд, а кожны яго ўдзельнік – моцны добры чарадзей. У экспазіцыі прадстаўлена 45 партрэтаў – сімвалічных акенцаў у свет мары і надзеі, моцнай падтрымкі, мудрасці народнай традыцыйнай культуры. З іх 9 рэальных герояў становяцца 9 міфічнымі сутнасцямі, прадстаўленымі ў фотасерыях, увасабляючы выразна, красамоўна, маляўніча знешнія рысы і характары міфічных істот.

Калі: 24 студзеня – 26 лютага
Дзе: Нацыянальная бібліятэка Беларусі, пр. Незалежнасці, 116, Мінск

"GastroFest.Кава"-2024 у Беларусі

Фестываль GastroFest вяртаецца з новым праектам. На працягу 18 дзён кавярні пяці гарадоў – Брэста, Віцебска, Гомеля, Гродна і Мінска – будуць радаваць і здзіўляць наведвальнікаў новымі смакавымі спалучэннямі і майстэрствам гатавання кававых напіткаў. Кожны ўдзельнік зможа загадзя азнаёміцца з прапановамі ўстаноў і выбраць дэгустацыйны сэт, які будзе складацца з кавы і дэсерту, па фіксаванай цане. Таксама адбудзецца народнае галасаванне за ўстанову і сэт на інтэрнэт-пляцоўках праекта.

Калі: 1–18 лютага
Дзе: установы-ўдзельніцы ў Мінску, Брэсце, Віцебску, Гомелі і Гродне

Новая праграма "Магія фантанаў" у Белдзяржцырку

Беларускі дзяржаўны цырк прадстаўляе феерычнае воднае шоу "Магія фантанаў", у якім увасобяцца самыя смелыя праекты пастаноўшчыкаў – маляўнічыя фантаны з лазернай інсталяцыяй, гіганцкія струмені танцуючай вады, дождж і вадаспады пад купалам цырка! У праграме выступяць канатаходцы, эквілібрысты, паветраныя гімнасты на рамянях, гімнастка з хула-хупамі на люстраным шары, жанглёр, клоўн. У нумарах задзейнічаны марскія коцікі, папугаі, дрэсіраваныя мядзведзі, малпы…

Калі: 3 лютага – 31 сакавiка
Дзе: Беларускі дзяржаўны цырк, пр. Незалежнасці, 32, Мінск

Экафестываль "Ноч ваўкоў" у парку "Прыпяцкі"

Адпачыць у дзікім кутку ўдалечыні ад горада, раскрыць сакрэты драпежнікаў і адчуць нядаўнюю прысутнасць ваўка (а, магчыма, і пачуць яго выццё!) запрашае Нацыянальны парк "Прыпяцкі". Госці двухдзённага фестывалю даведаюцца пра незвычайныя факты аб лясных насельніках і зададуць хвалюючыя пытанні на лекцыі "Ваўкоў баяцца – у лес не хадзіць", адправяцца на пошукі воўчага логава ў рамках тэматычнага квеста, а на вячэрняй экскурсіі, калі сцямнее, пройдуць "Воўчымі сцежкамі" да месца пражывання зграі, вывучаючы сляды і звычкі звяроў. Акрамя таго, на майстар-класе ўдзельнікі вырабяць сувеніры ў выглядзе ваўчанят на памяць аб незвычайных прыгодах. 

Калі: 4–5 і 18–19 лютага
Дзе: Нацыянальны парк "Прыпяцкі"

ABSOLUTE HITS: канцэрт сімфанічнага аркестра IP ORCHESTRA

Сімфанічны аркестр IP ORCHESTRA пад кіраўніцтвам вядомага расійскага музыканта і дырыжора Ігара Панамарэнкі паспяхова гастралюе на пяці кантынентах. Для музыкантаў не існуе перашкод і ў музычных эксперыментах: канцэрты з музыкай Вівальдзі і Штрауса, танга П'яцалы, класікай рока, мелодыямі айчыннага і замежнага кіно сталі візіткай аркестра. У праграму шоу ўвайшлі кампазіцыі розных эпох і аркестравыя апрацоўкі песень Эдзіт Піяф, Мірэй Мацьё, Элвіса Прэслі, Мадоны, Джо Дасэна, Ціны Цёрнер, Майкла Джэксана, Адэль, Фрэдзі Мерк'юры, Лэдзі Гагі, Элтана Джона, Уітні Х'юстан, Стынга, а таксама груп Nirvana, AC/DC, Deep Purple, Led Zeppelin.

Дзе, калі:

7 лютага – КЗ "Мінск", вул. Кастрычніцкая, 5, Мінск
8 лютага – Гродзенская абласная філармонія, вул. Гарнавых, 17, Гродна
9 лютага – ПКіТ "Нафтавік", вул. Савецкая, 38, Рэчыца
10 лютага – Гомельскі абласны грамадска-культурны цэнтр, вул. Ланге, 17, Гомель

Bison RACE 2024 у Сілічах

BISON RACE – гэта гонка з перашкодамі, дзе атлеты дзякуючы сваёй падрыхтоўцы і фізічнай вынослівасці пераадольваюць вышыню штучных і натуральных бар'ераў, а таксама ваду і агонь на сваім шляху! У залежнасці ад узросту ўдзельнікаў экстрэмальнага спартыўнага мерапрыемства прадугледжана чатыры дыстанцыі рознай ступені складанасці – 1,5 км (9–12 гадоў), 3 км (13–17 гадоў), 5 км (Open) і 10 км (ад 18 да 50+).

Калі: 11 лютага
Дзе: Рэспубліканскі гарналыжны цэнтр "Сілічы", Лагойскі раён, Мінская вобласць

Тэатр Вахтангава ў Мінску: спектакль "Яўген Анегін"

Тэатр імя Яўгена Вахтангава прывязе ў беларускую сталіцу знакаміты спектакль "Яўген Анегін" Рымаса Тумінаса, які ў мінулым годзе адзначыў 10-годдзе. Як адзначыў рэжысёр-пастаноўшчык, ён "спрабаваў разбурыць стэрэатыпы, імкнуўся да поліфанічнасці, музычнасці, эмоцый, пры гэтым хацелася пазбегнуць напышлівасці і несапраўднай лірычнасці"... Гэты раман у вершах, створаны ў эпоху рамантызму, лічыцца энцыклапедыяй свайго часу, дзе "сучасны свет паўстаў з усім яго холадам, прозай і пошласцю". Вобразы галоўных герояў твора Пушкіна ўвасобілі на сцэне яркія артысты тэатра – Сяргей Макавецкі, Людміла Максакава, Віктар Дабранраваў, Ірына Купчанка, Кацярына Крамзіна, Алег Макараў.

Калі: 16, 17, 18 лютага
Дзе: Цэнтральны Дом афіцэраў, вул. Чырвонаармейская, 3, Мінск

Маскоўскі сучасны мастацкі тэатр у Мінску: "Ганна Карэніна"

Спектакль па матывах рамана Льва Талстога "Ганна Карэніна" пакажуць у Мінску артысты Маскоўскага сучаснага мастацкага тэатра. Галоўную ролю ў п'есе выконвае артыстка драматычнага тэатра і кіно, член Гільдыі акцёраў кіно Расіі, ураджэнка беларускага пасёлка Абухава Яніна Мелехава. Прэм'ера рэжысёра Руслана Банкоўскага, які вучыўся ў Беларускім тэатральным інстытуце, адбылася вясной 2017 года, спектакль створаны ў традыцыях класічнага рускага тэатра. Галоўныя ролі ў пастаноўцы выконваюць папулярныя акцёры тэатра і кіно – народны артыст Расіі Уладзімір Сцяклоў, Міхаіл Паўлік, заслужаная артыстка Расіі Вольга Анохіна.

Калі: 18 лютага
Дзе: КЗ "Мінск", вул. Кастрычніцкая, 5, Мінск

"Шоу аркестраў": папулярная класіка і любімыя мелодыі кіно

Канцэрт, прысвечаны юбілею дырыжора Аляксандра Высоцкага, стане сапраўднай бітвай праслаўленых калектываў. Адначасова на сцэне Вялікай залы сталічнай Філармоніі выступяць Нацыянальны акадэмічны народны аркестр Рэспублікі Беларусь імя І.І. Жыновіча і сімфанічны аркестр Белтэлерадыёкампаніі. На працягу вечара прагучыць як знакамітая класіка – творы Чайкоўскага, Лекуона, Брамса, Хачатурана, так і любімыя мелодыі з сусветнага кіно, напрыклад, "Калыханка для анёла" са "Спіса Шындлера", саўндтрэкі з фільмаў "Гары Потэр", "Місія", "Нью-Ёрк, Нью-Ёрк", "Місія невыканальная", "Піраты Карыбскага мора".

Калі: 21 лютага
Дзе: Беларуская дзяржаўная філармонія, пр. Незалежнасці, 50, Мінск

"Праводзіны Снягурачкі. Масленіца" ў Белавежскай пушчы

Маёнтак беларускага Дзеда Мароза ў Белавежскай пушчы ў снежні 2022-га адсвяткаваў 20-годдзе. Завершыць юбілейны зімовы сезон урачыстая цырымонія праводзін унучкі ляснога чарадзея – Снягурачкі, якая на зімовай запрэжцы адправіцца на Паўночны полюс. Госці казачнай рэзідэнцыі прымуць удзел у музычна-забаўляльнай праграме і народных гульнях "Маладзецкія забавы", змогуць набыць сувеніры на выставах рамеснікаў або вырабіць аўтарскія падарункі на майстар-класах "Гарады майстроў". А ў канцы праграмы – пачаставацца румянымі блінамі з пушчанскімі начынкамі і сагрэцца травяным чаем.

Калі: 25 лютага
Дзе: Нацыянальны парк "Белавежская пушча", Камянецкі раён, Брэсцкая вобласць