Падзеі, факты, анонсы

Гродна, як і ўся краіна, год ад году мяняецца да лепшага. Горад прымае "Марафон адзінства"

17 студзеня, Гродна /Кар. БЕЛТА/. Аб тым, як Гродна сустракае "Марафон адзінства", як развіваецца абласны цэнтр і якія сацыяльныя аб'екты тут узводзяцца, расказаў старшыня Гродзенскага гарвыканкама Андрэй Хмель, перадае карэспандэнт БЕЛТА.

"У Гродне працуюць больш за 20 лакацый "Марафону адзінства": выставы, знакавыя сустрэчы, канцэрты, сустрэчы ў працоўных калектывах, гала-канцэрт. Кожная падзея знакавая", - сказаў Андрэй Хмель.

Ён падкрэсліў, што новы фармат вельмі пазітыўна ўспрымаецца людзьмі, горад рыхтуецца, чакае, дэманструе адзінства. "Усё пазнаецца ў параўнанні, - сказаў Андрэй Хмель. - Наша жыццё мяняецца да лепшага год ад году. Людзі больш сталага ўзросту добра памятаюць, з чаго пачыналася наша незалежнасць, з якімі цяжкасцямі нам давялося сутыкнуцца. Дзякуючы моцнаму лідару, вакол якога з'яднаўся беларускі народ, мы сапраўды рушылі наперад. Гэта відаць па развіцці прадпрыемстваў, аховы здароўя, адукацыі, добраўпарадкаванні. Мы сёння па многіх напрамках з'яўляемся лідарамі. І гэта дарагога каштуе, паколькі ў развіццё трэба было ўкласціся кожнаму жыхару нашай краіны сваёй працай, нашым адзінствам".

Як расказаў старшыня гарвыканкама, на 2025 год у абласным цэнтры намечана будаўніцтва і адкрыццё шэрага сацыяльных аб'ектаў. Гэта дзве амбулаторыі, для дарослых і дзяцей, віядук на вуліцы Фамічова. Шмат планаў па будаўніцтве дарог, развіцці транспартнай інфраструктуры, рамонце і добраўпарадкаванні дваровых тэрыторый. Прадоўжыцца будаўніцтва аб'язнога кальца, будзе рэканструявана некалькі пуцеправодаў і мастоў. Асаблівая ўвага будзе ўдзелена будаўніцтву гарадской бальніцы, старт якому даў Прэзідэнт. Прадоўжыцца будаўніцтва абласнога анкацэнтра, пачалося ўзвядзенне новага спартыўнага комплексу.

"Важна выканаць задачу, пастаўленую Прэзідэнтам, навесці ідэальны парадак у краіне, - падкрэсліў Андрэй Хмель. - Гэты год стане стартавым, прарывам як у краіне, так і ў Гродне".

Старшыня гарвыканкама нагадаў, што праз тры гады Гродна адзначыць 900-годдзе. Будзе зроблена ўсё для дастойнай сустрэчы гэтай знакавай даты. Андрэй Хмель асабліва падкрэсліў: усё, што робіцца ў горадзе, як і ва ўсёй краіне, у першую чаргу робіцца для людзей.

версія для друку

зрабіць стартавай

дабавіць у выбранае