Падзеі, факты, анонсы

14 кастрычніка, Віцебск /Алёна Ціханава - БЕЛТА/. Выступленні музыкантаў з Беларусі, Расіі, Аўстрыі, Італіі, Германіі, Даніі адбудуцца на XX Міжнародным фестывалі арганнай музыкі "Званы Сафii" ў Полацку. Аб гэтым карэспандэнту БЕЛТА паведамілі ў Полацкім райвыканкаме.

Мерапрыемствы форуму пройдуць з 18 кастрычніка па 22 лістапада. Свята збярэ пад купалам Сафійскага сабора масцітых музыкантаў і таленавітых маладых выканаўцаў. У канцэртах прагучыць музыка майстроў эпохі барока, французскага і нямецкага рамантызму, сучасных кампазітараў. Можна будзе пачуць не толькі адзін арган, але і ў дуэце са скрыпкай, трубой, флейтай, разам з вакалам і камерным хорам.

Напрыклад, 18 кастрычніка ў Полацку выступіць дуэт з Даніі Ханс Хрысціян Хейн (арган) і Пітэр Дам-Хейн (барытон). Французскую рамантычную музыку прадставіць 25 кастрычніка арганіст П'ер Зеворт (Францыя). Урачыстае адкрыццё фестывалю адбудзецца 1 лістапада - беларускія салісты Ксенія Пагарэлая (арган), Вікторыя Бабенка (скрыпка) і Валянцін Юхневіч (труба) падораць слухачам шэдэўры класічнай і папулярнай музыкі. Упершыню на фестывалі ў Полацку выступіць італьянскі арганіст Эўджэніа Марыя Фаджыяні - яго канцэрт запланаваны на 21 лістапада. Завершыць форум 22 лістапада расійскі дуэт Яўген і Ксенія Аўраменкі, якія выканаюць музыку Баха.

I Міжнародны фестываль арганнай музыкі "Званы Сафіі" адкрыўся ў Полацку 15 лістапада 1996 года. За дваццацігадовую гісторыю праекта на полацкім фестывалі выступілі музыканты з 22 краін, адбылося 124 фестывальныя канцэрты, на якіх пабывалі больш за 20 тыс. аматараў арганнай музыкі.