Падзеі, факты, анонсы
"Душа беларускага народа". У Маскве адкрылася выстава "Песняры-55"
20 жніўня, Масква /Эдуард Півавар - БЕЛТА/. Выстава "Песняры-55", падрыхтаваная Нацыянальным гістарычным музеем Беларусі, адкрылася 20 жніўня ў Маскве ў Расійскім нацыянальным музеі музыкі. Яна прымеркавана да 55-гадовага юбілею знакамітага музычнага калектыву, які будзе адзначацца 1 верасня, перадае карэспандэнт БЕЛТА.
"У нас была ідэя, што ў Маскву трэба прывезці "душу беларускага народа", і амаль адразу мы зразумелі, што гэта "Песняры", улічваючы, што ў гэтым годзе іх юбілей, - расказаў на вернісажы журналістам дырэктар Нацыянальнага гістарычнага музея Беларусі Аляксандр Храмой. - Гэта першая музычная выстава музея. Спадзяюся, што яна спадабаецца масквічам, і зыходзячы з гэтага мы будзем вызначаць далейшыя перспектывы супрацоўніцтва з Расійскім музеем музыкі".
"Песняры" - адзін з любімых маіх музычных калектываў, - падзяліўся генеральны дырэктар Расійскага нацыянальнага музея музыкі Міхаіл Брызгалаў. - У мінулым годзе мы прадстаўлялі ў Мінску выставу, прысвечаную Сяргею Рахманінаву. І тады нарадзілася ідэя зрабіць выставу ў адказ, прысвечаную "Песнярам". Нашы калегі зрабілі выставу з вялікай любоўю, тут ёсць вельмі рэдкія прадметы. Але мы таксама дабавілі свайго: калі толькі паўстала пытанне аб выставе "Песняроў", мы знайшлі ў нас у архіве рукапіс песні Ігара Лучанка, напісанай спецыяльна для "Песняроў". Не было б гэтай выставы, можа, гэты рукапіс так бы заставаўся ў архівах. Мы ўдзячны міністэрствам культуры Беларусі і Расіі, Беларускай дзяржаўнай філармоніі за дапамогу. Ну і вядома, прыезд сёння на адкрыццё Марыны Мулявінай (дачкі кіраўніка "Песняроў". - Заўвага БЕЛТА) і Уладзіслава Місевіча (музыканта легендарнага складу ансамбля. - Заўвага БЕЛТА) - гэта вялікая радасць".
У сваю чаргу, Марына Мулявіна паведаміла, што палавіна экспанатаў, якія прадстаўлены на выставе, - асабістыя рэчы Уладзіміра Мулявіна. "Упершыню я прывезла бацькаву гітару (гэта чацвёрты па ліку яго інструмент) і гітарны чахол, у якім па чарзе захоўваліся ўсе інструменты, якімі карыстаўся музыкант", - расказала яна.
"Гэта выстава, напэўна, яшчэ раз расказвае, як уральскі хлопчык палюбіў беларускую песню і зрабіў усё, каб яна стала вядомай і любімай не толькі ў Беларусі, але і ў Расіі", - падкрэсліла дачка заснавальніка "Песняроў".
На выставе прадстаўлены шматлікія пласцінкі, касцюмы "Песняроў", музычныя інструменты, а таксама рэдкія фатаграфіі і іншыя дакументальныя матэрыялы, размешчаныя на 20 планшэтах. Яны падрабязна ілюструюць творчы шлях і этапы станаўлення ансамбля з моманту зараджэння і да нашых дзён, а таксама біяграфію яго мастацкага кіраўніка Уладзіміра Мулявіна.
Выстава суправаджаецца аўдыязапісамі з фондаў Расійскага нацыянальнага музея музыкі і відэаматэрыяламі з выбранымі выступленнямі ансамбля перыяду яго найбольшага росквіту (1970-1980-я гады). Сярод іх - рэдкія запісы канцэртаў, конкурсаў, тэлеперадач, а таксама фрагменты з кінафільмаў.
Выстава будзе працаваць для наведвальнікаў па 20 кастрычніка.
версія для друку
зрабіць стартавай
дабавіць у выбранае