Падзеі, факты, анонсы
Больш за 3,4 тыс. заявак са 124 краін. Што чакае гледачоў кінафестывалю "Лістапад"
Фота listapad.org
16 кастрычніка, Мінск /Кар. БЕЛТА/. Больш за 3,4 тыс. заявак са 124 краін свету паступіла на XXX Мінскі міжнародны кінафестываль "Лістапад", паведаміла журналістам начальнік аддзела па кінематаграфіі Міністэрства культуры Ірына Дрыга, перадае карэспандэнт БЕЛТА.
"Для ўдзелу ў фестывалі было пададзена больш за 3,4 тыс. заявак са 124 краін свету. Для параўнання ў мінулым годзе было крыху больш за 2 тыс. заявак, гэта значыць цікавасць да фестывалю вырасла", - сказала Ірына Дрыга.
Паводле яе слоў, галоўнай тэмай свята стане 100-годдзе беларускага кінематографа. Запланавана вялікая пазаконкурсная праграма і паказы кінакарцін, якія былі адзначаны ўзнагародамі фестывалю ў мінулыя гады. Цырымоніі адкрыцця і закрыцця фестывалю пройдуць у Палацы Рэспублікі. Адкрыецца "Лістапад" беларуска-расійскай стужкай "Чорны замак", створанай па матывах рамана Уладзіміра Караткевіча.
У кінатэатры "Перамога" пройдуць Дні нацыянальнага кіно, на якіх акрамя кінакарцін будуць прэзентаваны выставы, прысвечаныя краіне-ўдзельніцы. Беларусы змогуць убачыць рэдкае і экзатычнае кіно. Выбраны карціны з Індыі, Ірана, Пакістана, Узбекістана, Зімбабвэ і Рэспублікі Саха (Расія). Ірына Дрыга падкрэсліла, што апошнія выклікалі вялікае абмеркаванне ў кінасупольнасці, але да гэтага часу не былі прадстаўлены ў беларускім пракаце.
Праграмны дырэктар конкурсу ігравога кіно Дзмітрый Марынін расказаў, што на фестывалі прадставяць 18 кінакарцін з 17 краін. Журы конкурсу ігравога кіно ўзначаліць акцёр і прадзюсар з Кітая Лей Хань. Таксама ў яго ўвойдуць генеральны дырэктар УП "Кінавідэапракат" Уладзімір Карачэўскі, народны артыст РФ, прадзюсар і рэжысёр Ігар Угольнікаў, рэжысёр з Ірана, пераможца конкурсу "Кіно маладых" на "Лістападзе-2021" Нушын Мераджы, актрыса і рэжысёр з Сербіі Івана Жыгон, дырэктар кінацэнтра і кінафестывалю ў Пусане Кім Джын Хэ, а таксама расійскі кінакрытык і кіназнавец Аляксандр Семянюк.
Сярод самых чаканых карцін - фільм індыйскага рэжысёра Паялы Кападзія "Усё, што нам здаецца святлом", які атрымаў Гран-пры Канскага фестывалю гэтага года. Таксама прадставяць новую работу расійскага рэжысёра грузінскага паходжання Бакура Бакурадзэ "Снег у маім двары", якая была ўдастоена прыза за лепшую рэжысуру на Шанхайскім міжнародным кінафестывалі.
У конкурсе неігравога кіно пакажуць 12 фільмаў з 7 краін, анімацыйнага кіно - 50. У праграме конкурсу фільмаў для дзяцей і юнацтва "Лістападзік" - 7 кінастужак, кіно маладых - 11. У конкурс нацыянальных кінашкол увайшло 15 фільмаў, у нацыянальны конкурс - 23 фільмы.
Праграмным дырэктарам конкурсу неігравога кіно стаў Аляксандр Пятровіч, "Лістападзіка" - Кацярына Тамковіч-Латута. За праграму конкурсу анімацыйных фільмаў прадоўжыць адказваць Канстанцін Андрушачкін.
версія для друку
зрабіць стартавай
дабавіць у выбранае