Падзеі, факты, анонсы

Беларускія школьнікі сталі прызёрамі на XVI Міжнароднай алімпіядзе па навуках аб Зямлі

Фота bsu.by

31 жніўня, Мінск /Кар. БЕЛТА/. Беларускія школьнікі пад кіраўніцтвам выкладчыкаў БДУ заваявалі два сярэбраныя і тры бронзавыя медалі на XVI Міжнароднай алімпіядзе па навуках аб Зямлі (IESO 2023), якая праходзіла з 21 па 26 жніўня ў анлайн-фармаце. Аб гэтым паведамілі БЕЛТА ў прэс-службе Беларускага дзяржаўнага ўніверсітэта.

У асабістым заліку "серабро" заваяваў вучань 11-га класа сталічнай гімназіі нумар 13 Арсень Лысак. Бронзавымі медалямі ўзнагароджаны дзесяцікласнікі сярэдняй школы нумар 18 у Баранавічах Аляксандра Багданава і гімназіі нумар 1 Віцебска імя Ж.І.Алфёрава Вадзім Ігнаценка.

У групавым туры сярэбранага медаля быў удастоены выпускнік Мінскага дзяржаўнага абласнога ліцэя Ягор Рабцэвіч. "Бронзай" адзначаны навучэнец 10 класа гімназіі нумар 1 Віцебска імя Ж.І.Алфёрава Вадзім Ігнаценка.

Кіраўнікамі беларускай каманды выступілі першы прарэктар БДУ Дзмітрый Курловіч і дэкан факультэта павышэння кваліфікацыі і перападрыхтоўкі Інстытута дадатковай адукацыі ВНУ Уладзімір Махнач.

"У індывідуальным туры юныя географы дэманстравалі свае веды па геалогіі і палеагеаграфіі. Удзельнікаў групавога этапу размеркавалі па міжнародных камандах для выканання праблемных кейсаў па пытаннях змянення клімату. Усе заданні трэба было выканаць на англійскай мове. Усяго ў спаборніцтве прынялі ўдзел 179 школьнікаў з 32 краін свету ", - адзначылі ў прэс-службе ВНУ.

Краінамі - арганізатарамі Міжнароднай алімпіяды ў бягучым годзе выступілі Індыя, Ізраіль і КНР.

Міжнародная алімпіяда па навуках аб Зямлі (IESO) праводзіцца штогод з 2007 года пад патранажам Міжнароднай адукацыйнай арганізацыі па навуках аб Зямлі. Арганізуецца яна сярод вучняў устаноў агульнай сярэдняй адукацыі. IESO прызначана павысіць цікавасць школьнікаў і прыцягнуць увагу грамадскасці да навук аб Зямлі, выявіць таленавітых і адораных вучняў у гэтай прадметнай галіне. У наступным годзе алімпіяду плануюць правесці ў вочным рэжыме ў Пекіне (КНР).

версія для друку

зрабіць стартавай

дабавіць у выбранае