Падзеі, факты, анонсы

Беларускія гімнасты заваявалі 20 медалёў на турніры ва Узбекістане

Фота bga.by

27 лістапада, Мінск /Кар. БЕЛТА/. Ва Узбекістане завяршыліся міжнародныя спаборніцтвы па спартыўнай гімнастыцы. Аб гэтым паведамілі БЕЛТА ў прэс-службе Беларускай асацыяцыі гімнастыкі.

Акрамя гімнастаў з Узбекістана і Беларусі, удзел у турніры прынялі прадстаўнікі Расіі, Казахстана, Кыргызстана, Індыі і Пакістана. У актыве нашай каманды - дваццаць узнагарод (8 залатых, 7 сярэбраных і 5 бронзавых). У спаборніцтвах мужчын тры медалі заваяваў Ягор Шарамкоў, які перамог у вольных практыкаваннях, а таксама аказаўся другім у мнагабор'і і трэцім у апорным скачку. Сярэбраным прызёрам па выніках праграмы на кані стаў Мікіта Парфяновіч. Сярод дзяўчат наша Дар'я Жукоўская выйграла бронзу ў мнагабор'і і па выніках практыкавання на брусах. Акрамя таго, жаночая зборная Беларусі стала лепшай у камандным першынстве, у мужчын - серабро.

У спаборніцтвах юніёраў поўны камплект узнагарод сабраў Багдан Ільінкоў, які перамог у мнагабор'і і на кані, а таксама стаў другім на кольцах і трэцім на брусах. Уладальніцай адразу пяці медалёў сярод юніёрак стала Сафія Штыхецкая, на рахунку якой золата ў мнагабор'і і ў вольных практыкаваннях, серабро ў апорным скачку і на бервяне і бронза па выніках праграмы на брусах. У гэтым практыкаванні перамагла наша Алена Цітавец, яшчэ адна беларуска Кіра Магарэвіч выйграла золата ў камбінацыі на бервяне і заняла другое месца ў вольных практыкаваннях.

версія для друку

зрабіць стартавай

дабавіць у выбранае