Падзеі, факты, анонсы

Беларускі тэнісіст Ягор Герасімаў выйшаў у 1/8 фіналу турніру ў Марсэлі

10 сакавіка, Мінск /Кар. БЕЛТА/. Беларускі тэнісіст Ягор Герасімаў (76-ы нумар сусветнага рэйтынгу) выйшаў у 1/8 фіналу турніру ў французскім Марсэлі з прызавым фондам 334,2 тыс. еўра, паведамляе карэспандэнт БЕЛТА.

Сёння Ягор Герасімаў у матчы 1/16 фіналу ўсяго за 55 мінут перамог нямецкага тэнісіста Яніка Ханфмана (105) - 6:2, 6:0. У паядынку за выхад у чвэрцьфінал беларус згуляе з трэцяй ракеткай свету расіянінам Даніілам Мядзведзевым.

У 1/8 фіналу адзіночнага разраду жаночага турніру ў Дубаі з прызавым фондам $1,8 млн восьмая ракетка планеты беларуска Арына Сабаленка перамагла эстонскую тэнісістку Анет Кантавейт (24-ы нумар рэйтынгу WTA) - 6:3, 6:2. У матчы за выхад у паўфінал саперніцай Арыны Сабаленка будзе пераможца сустрэчы паміж полькай Ігай Свёнтак (15) і іспанкай Гарбінье Мугурусай (16). У паядынку 1/16 фіналу Арына Сабаленка абыграла французскую тэнісістку Алізэ Карнэ (59) - 6:2, 6:4.

Пазней за выхад у чвэрцьфінал парнага разраду Арына Сабаленка і бельгійская тэнісістка Элізэ Мертэнс, пасеяныя пад першым нумарам, сустрэнуцца з амерыканскім дуэтам Джэсіка Пегула / Бэтані Матэк-Сандс. Беларуска-грузінскі тандэм Лідзія Марозава / Аксана Калашнікава не змог выйсці ў 1/8 фіналу, уступіўшы ў трохсэтавым матчы расійска-румынскай пары Анастасія Патапава / Моніка Нікулеску - 7:6 (7:1), 0:6, 6:10.

Турнір у Дубаі завершыцца 13 сакавіка, спаборніцтвы ў Марсэлі фінішуюць на дзень пазней.

версія для друку

зрабіць стартавай

дабавіць у выбранае