Падзеі, факты, анонсы
Беларускі куток адкрыўся ў гістарычным цэнтры Анкары
5 кастрычніка, Мінск /Кар. БЕЛТА/. У гістарычным цэнтры сталіцы Турэцкай Рэспублікі - Крэпасці Анкары адкрыўся Беларускі куток, паведамілі карэспандэнту БЕЛТА ў пасольстве Беларусі ў Турцыі.
Тут кожны жадаючы зможа азнаёміцца з творамі мастацкага і выяўленчага мастацтва беларускіх майстроў. Беларускі куток з'яўляецца ініцыятывай турэцкага калекцыянера і мецэната Эрола Угурлу, які мае беларускія і расійскія карані (яго маці - ураджэнка Гродна, а бацька - Санкт-Пецярбурга), рэалізаванай сумесна з пасольствам Рэспублікі Беларусь у Анкары.
Адкрыццё экспазіцыі карцін і вырабаў мастацкага промыслу беларускіх мастакоў і майстроў было прымеркавана да пачатку работы Турэцка-расійскага дома дружбы дыпламатаў і дзеячаў мастацтва, у якім размешчаны таксама работы расійскіх і іншых дзеячаў мастацтва краін СНД.
На адкрыцці Беларускага кутка наведвальнікаў частавалі стравамі беларускай нацыянальнай кухні. Ва ўрачыстым мерапрыемстве разам з Надзвычайным і Паўнамоцным Паслом Беларусі ў Турцыі Віктарам Рыбаком і супрацоўнікамі беларускай загранустановы прынялі ўдзел пасол Расіі ў Турцыі, кіраўнік прадстаўніцтва Рассупрацоўніцтва ў Турцыі, віцэ-мэр Анкары, кіраўнік муніцыпалітэта раёна Алтындаг г.Анкары, прадстаўнікі турэцкай і расійскай грамадскасці.
У сваім выступленні з нагоды адкрыцця Беларускага кутка Віктар Рыбак падкрэсліў, што Эрол Угурлу, з'яўляючыся патрыётам сваёй краіны, уносіць важны ўклад ва ўмацаванне і развіццё культурных сувязей з Беларуссю, Расіяй і іншымі краінамі Садружнасці Незалежных Дзяржаў. Менавіта таму ў Турэцка-расійскім доме дружбы дыпламатаў і дзеячаў мастацтва можна сустрэць работы аўтараў краін СНД. На сённяшні дзень Беларускі куток прадстаўлены ў тым ліку работамі і Гродзенскага абласнога метадычнага цэнтра народнай творчасці, Мастоўскага раённага цэнтра рамёстваў, Шчучынскага раённага цэнтра культуры і народнай творчасці.
Крэпасць Анкары - гістарычны замак, размешчаны ў раёне Алтындаг. Дакладная дата яго пабудовы невядомая, аднак гісторыкамі ўстаноўлена, што замак існаваў у пачатку другога стагоддзя да нашай эры.
версія для друку
зрабіць стартавай
дабавіць у выбранае