Падзеі, факты, анонсы

15 чэрвеня, Баку /Аляксандр Новікаў - БЕЛТА/. Беларускі барэц грэка-рымскага стылю Іосіф Чугашвілі стаў бронзавым прызёрам на першых Еўрапейскіх гульнях у вагавой катэгорыі 130 кг, паведамляе карэспандэнт БЕЛТА.

У ходзе турніру Іосіф Чугашвілі аказаўся мацнейшым за грэка Александраса Пападатоса, у чвэрцьфінале беларускі барэц перамог вядомага нямецкага атлета Эдуарда Попа, але ў паўфінале за права пазмагацца за залаты медаль Чугашвілі ўступіў азербайджанцу Сабахі Шарыяці.

У паядынку за бронзавую ўзнагароду Іосіф Чугашвілі сустрэўся з грузінскім атлетам Якобі Каджая і змог правесці вырашальны накат, які даў магчымасць яму перамагчы.

Для зборнай Беларусі па грэка-рымскай барацьбе гэта трэці медаль на першых Еўрапейскіх гульнях у Баку. Пасля двух дзён спаборніцтваў усе тры ўзнагароды на рахунку прадстаўнікоў грэка-рымскай барацьбы.

У фінальнай сустрэчы ў катэгорыі 130 кг азербайджанец Сабахі Шарыяці ўступіў барцу з Турцыі Рызэ Каялпе. Другую бронзавую ўзнагароду ў самай цяжкай вагавой катэгорыі выйграў эстонец Хейкі Набі.

У вячэрняй праграме турніру па грэка-рымскай барацьбе вызначыліся пераможцы і прызёры ў катэгорыі 66 кг. Чэмпіёнам гульняў у гэтай вазе стаў Арцём Суркоў, які выйграў у фінале ў Міграна Аруцюняна з Арменіі. Бронзавымі прызёрамі сталі Хасан Аліеў з Азербайджана і Іштван Леваі са Славакіі.

У катэгорыі 75 кг гаспадар барцоўскага дывана ў Баку Элвін Мурзаліеў был мацнейшым у вырашальным паядынку за серба Віктара Немеша, трэцяе месца занялі расіянін Чынгіз Лабазанаў і ўкраінец Дзмітрый Пышкоў. У катэгорыі 85 кг расіянін Давіт Чакветадзэ выйграў у фінале ў Жана Беленюка з Украіны, бронзавыя ўзнагароды заваявалі Рамшын Азіжыр з Германіі і Метэхан Башар з Турцыі.

Барцоўскі турнір у спарткомплексе Гейдара Аліева ў Баку прадоўжыцца 15 чэрвеня, медалі разыграюць жанчыны ў вагавых катэгорыях 48 кг, 55 кг, 60 кг і 69 кг