Падзеі, факты, анонсы

Арына Сабаленка выйшла ў чвэрцьфінал тэніснага турніру ў Маямі

Арына Сабаленка. Фота з архіва

28 сакавіка, Мінск /Кар. БЕЛТА/. У ЗША прадаўжаецца адзін з самых прэстыжных турніраў у календары Жаночай тэніснай асацыяцыі - адкрыты чэмпіянат Маямі, паведамляе карэспандэнт БЕЛТА.

Мінулай ноччу першая ракетка Беларусі і другая сеяная турніру Арына Сабаленка правяла матч чацвёртага круга. Саперніцай беларускай тэнісісткі была Барбара Крэйчыкава з Чэхіі, якая раней выбіла з барацьбы за тытул нашу Аляксандру Сасновіч. Справіцца з яшчэ адной беларускай чэшцы не ўдалося, сустрэча завяршылася пераканаўчай перамогай Сабаленкі ў двух сэтах - 6:3, 6:2. Паядынак прадаўжаўся крыху больш за гадзіну.

Такім чынам, Арына, якая пакуль не прайграла на турніры ні партыі, выйшла ў чвэрцьфінал Miami Open. Там нашу спартсменку чакае сустрэча супраць Сараны Кырсці з Румыніі, матч адбудзецца вечарам 29 сакавіка. Пераможца гэтай гульні ў паўфінале турніру ў Маямі згуляе з мацнейшай тэнісісткай з пары Кацярына Аляксандрава (Расія) - Петра Квітава (Чэхія).

версія для друку

зрабіць стартавай

дабавіць у выбранае