Падзеі, факты, анонсы
Археалагічную калекцыю Язэпа Драздовіча ўпершыню прадставяць у Нацыянальным гістарычным музеі
5 кастрычніка, Мінск /Кар. БЕЛТА/. Выстаўка "Археалагічны помнік: фіксацыя мінулага ў мінулым" адкрыецца 13 кастрычніка ў Нацыянальным гістарычным музеі Беларусі, паведамілі БЕЛТА ў аддзеле інфармацыйна-выставачнай работы ўстановы.
Экспазіцыя павінна прыцягнуць увагу да захавання гісторыка-культурнай спадчыны Беларусі. "Адна з тэматычных ліній - гісторыя станаўлення айчыннай археалогіі як навукі, якое адбылося ў 1920-1930-я гады. Менавіта ў гэты час былі "зафіксаваны" шматлікія помнікі археалогіі. Некаторыя з іх існуюць і ў наш час, а некаторыя не. На працягу 100 гадоў айчынная археалогія старанна працуе на карысць краіны, але яе героі часта застаюцца ў цені. Выстаўка выпраўляе гэту несправядлівасць. Імёны Аляксандра Ляўданскага, Сяргея Дубінскага, Ісаака Сербава, Канстанціна Палікарповіча прадстаўлены шырокай грамадскасці праз здымкі і знаходкі першай палавіны ХХ стагоддзя. Асабліва цікавыя бытавыя фатаграфіі з экспедыцый таго часу: як людзі гатавалі ежу, як спалі ў паўзямлянках, як сплаўляліся на лодках па рэках", - адзначылі ў музеі.
Археалагічныя помнікі цікавілі не толькі даследчыкаў, але і мастакоў. На выстаўцы прадставяць арыгіналы і копіі графічных замалёвак, якія выкананы адным з самых своеасаблівых мастакоў Беларусі - Язэпам Драздовічам. "Гэты знакаміты беларус вядомы як пісьменнік, астраном-аматар, выкладчык, этнограф. Акрамя таго, ён цікавіўся археалогіяй. Сярод яго работ можна знайсці замалёўкі стратыграфій, помнікаў і нават рэканструкцыі. Упершыню будзе дэманстравацца ўнікальная археалагічная калекцыя мастака", - звярнулі ўвагу арганізатары.
Выстаўка стала часткай музейнага праекта "Мінулае мае будучыню: дыялог культуры і навукі". Экспазіцыя рэалізуецца пры падтрымцы грантам Прэзідэнта Беларусі ў культуры сумесна з Нацыянальным мастацкім музеем, Беларускім дзяржаўным архівам кінафотафонадакументаў, Беларускім дзяржаўным архівам навукова-тэхнічнай дакументацыі, Слонімскім раённым краязнаўчым музеем імя І.І. Стаброўскага, Цэнтральнай навуковай бібліятэкай імя Якуба Коласа НАН Беларусі, Інстытутам гісторыі НАН Беларусі, гістарычным факультэтам БДУ.
версія для друку
зрабіць стартавай
дабавіць у выбранае