Падзеі, факты, анонсы
Аліна Талай заняла 2-е месца ў бар'ерным спрынце на турніры Сусветнага выкліку ў Чэхіі
27 мая, Мінск /Кар. БЕЛТА/. Беларуская спартсменка Аліна Талай заняла 2-е месца на дыстанцыі 100 м з бар'ерамі на прадстаўнічым турніры з серыі Сусветнага выкліку (IAAF World Challenge Meetings), этап якога прайшоў у чэшскім горадзе Острава 26 мая. Аб гэтым БЕЛТА паведамілі ў Беларускай федэрацыі лёгкай атлетыкі (БФЛА).
Аліна Талай фінішавала ў фінальным забегу з рэзультатам 12,78 сек. Перамогу атрымала прадстаўніца ЗША Шэрыка Нэлвіс, яе час - 12,55 сек. Амерыканцы ўдалося пабіць рэкорд турніру на адной з найбольш прэстыжных дыстанцый. Разам з Нэлвіс і Талай на п'едэстал гонару ўзышла брытанка Тыфані Портэр (12,90 сек).
Аліна Талай некалькі дзён таму ўстанавіла асабісты рэкорд на стаметроўцы з бар'ерамі, выступаючы на іншым турніры з серыі Сусветнага выкліку ў галандскім Хенгела (12,70 сек). Наступным стартам для беларускай спартсменкі стане 4-ы этап Брыльянтавай лігі, які пройдзе ў Рыме 4 чэрвеня.
Турнір у Чэхіі (54th Ostrava Golden Spike) традыцыйна наведалі мноства знакамітых лёгкаатлетаў. Ямайскі бягун Усейн Болт выйграў спаборніцтвы на дыстанцыі 200 м з лепшым часам у сезоне - 20,13 сек, што сведчыць аб паступовым вяртанні яго былых кандыцый. Яшчэ адзін "зорны" прадстаўнік Ямайкі Асафа Паўэл упэўнена перамог на сваёй кароннай дыстанцыі 100 м, паказаўшы рэзультат 10,04 сек.
версія для друку
зрабіць стартавай
дабавіць у выбранае