Падзеі, факты, анонсы

18 лютага, Мінск /Кар. БЕЛТА/. ALEKSEEV прадставіць Беларусь на міжнародным конкурсе песні "Еўрабачанне-2018". Такі вынік фіналу нацыянальнага адбору на гэты творчы форум, трансляцыя якога вялася ў прамым тэлеэфіры, перадае карэспандэнт БЕЛТА.

Папулярны поп-спявак заваяваў сімпатыі публікі і журы, выканаўшы песню "Forever" і прадставіўшы эфектны нумар. Выканаўца стаў абсалютным лідарам галасавання гледачоў - 5 тыс.184 галасы, або 12 балаў. Журы таксама ацаніла выступленне артыста ў 12 балаў.

На другое месца гледачы паставілі групу Shuma (колькасць галасоў трансфармавалася ў 10 балаў), а судзейская калегія ацаніла музыкантаў толькі ў 4 балы. Другога месца, на думку журы, дастойна група "Радыёхваля". На трэцяе месца гледачы паставілі Кірыла Гуда, а журы - Гюнеш.

ALEKSEEV (Мікіта Аляксееў) папулярны на постсавецкай прасторы. Артыст у 2016 годзе перамог у намінацыі "Прарыў года" на прэміі "Муз-ТБ", стаў лаўрэатам прэміі "Залаты грамафон", у Беларусі яго назвалі спеваком года па выніках першай музычнай прэміі папулярнай музыкі "Наша Ліга".

Афіцыйны прадстаўнік Беларусі на міжнародным конкурсе песні "Еўрабачанне-2018" вызначаны ў час трансляцыі фіналу галасаваннем тэлегледачоў і прафесійнага журы па формуле 50x50. Судзейскую калегію ўзначаліла радыёвядучая, дырэктар радыёстанцыі "Радыус FM" Алена Трашчынская.

Па традыцыі пераможцу ўручана спецыяльная ўзнагарода - стылізаванае еўравізійнае сэрца, вырабленае па заказе Белтэлерадыёкампаніі шклозаводам "Нёман".

Міжнародны конкурс песні "Еўрабачанне-2018" пройдзе ў маі ў Лісабоне.