Тыдзень бацькоўскай любові ў Беларусі
Тыдзень бацькоўскай любові трэці раз правялі ў Беларусі. Па ўжо існуючай традыцыі, пачаліся святочныя мерапрыемствы 14 кастрычніка ў Дзень маці і прадоўжыліся да 21 кастрычніка, калі ў краіне адзначаецца Дзень бацькі. Заснаванне такога тэматычнага тыдня – гэта прызнанне на дзяржаўным узроўні важнейшай ролі сям’і ў развіцці грамадства, а яго мерапрыемствы прызначаны садзейнічаць папулярызацыі бацькоўства і сямейных каштоўнасцей сярод моладзі.
Пачаўся гэты душэўны марафон 14 кастрычніка са слоў кіраўніка дзяржавы Аляксандра Лукашэнкі, адрасаваных усім маці рэспублікі: "Прырода надзяліла пяшчотныя жаночыя сэрцы непаўторным пачуццём мацярынскай любові, якое сваёй цеплынёй і шчырасцю сагравае, натхняе і робіць нас мацнейшымі на працягу ўсяго жыцця. Клапатлівыя рукі мамы ствараюць дамашнюю ўтульнасць, яе мудрасць аберагае ад бед і памылак, а ласкавая ўсмешка і добрыя словы па-за часам і адлегласцю напаўняюць нашы мары і здзяйсненні дзіцячай радасцю і глыбокім сэнсам".
Беларуская дзяржава інвесціруе ў сям’ю, ствараючы маштабныя сацыяльныя праграмы, развіваючы ўмовы для нараджэння і выхавання дзяцей, а сацыяльная абарона і падтрымка сям’і дапамагае палепшыць якасць яе жыцця. Што важна, сацыяльная падтрымка ў адносінах да маці пачынаецца яшчэ да нараджэння дзіцяці. "Так, жанчына, даведаўшыся аб сваім стане, можа разлічваць на больш лёгкія ўмовы працы: будучых маці забаронена прыцягваць да звышурочных работ, работы ў дзяржаўныя святы і святочныя дні, работы ў начны час, выхадныя дні, накіроўваць у службовую камандзіроўку і гэтак далей. Сярод бонусаў таксама прадастаўленне сацыяльных водпускаў, бясплатнае медыцынскае суправаджэнне, матэрыяльная падтрымка ў выглядзе 11 дзяржаўных дапамог", – адзначыла кансультант упраўлення народанасельніцтва, гендарнай і сямейнай палітыкі Міністэрства працы і сацыяльнай абароны Алена Комлік.
А якія бонусы ёсць у бацькаў у Беларусі? "З 1990-х гадоў бацькам прадастаўлена права знаходзіцца ў водпуску па доглядзе дзіцяці да трох гадоў. Як і маці, у бацькаў ёсць права выбару працоўнага водпуску ў летні час пры выхаванні ў сям’і дзіцяці-інваліда ва ўзросце да 18 гадоў. У 2020 годзе для бацькаў з’явіўся кароткачасовы водпуск пры нараджэнні дзіцяці (на 14 дзён да спаўнення дзіцяці 6 месяцаў). Гэты водпуск наймальнік абавязаны прадаставіць, а па жаданні можа і аплаціць. У 2022 годзе ўказам кіраўніка дзяржавы ўстаноўлена новае свята – Дзень бацькі".
Пільная ўвага дзяржавы прыкавана да шматдзетных сем’яў, якія выхоўваюць траіх і больш дзяцей. Паводле слоў спецыяліста, "у першую чаргу гэта дапамога пры паляпшэнні жыллёвых умоў. Ільготны крэдыт на жыллё выдаецца шматдзетнай сям’і пад 1% гадавых на 40 гадоў. Пры гэтым для сем’яў з трыма дзецьмі дзяржава пагашае 75% ад сумы запазычанасці, а для сем’яў з чатырма і больш дзецьмі – поўнасцю". За апошнія тры гады колькасць шматдзетных сем’яў у Беларусі павялічылася на 10% і цяпер складае больш за 123 тысячы.
У мэтах папулярызацыі мацярынства і бацькоўства ў рамках Тыдня бацькоўскай любові-2024 у Беларусі адбыліся мерапрыемствы розных і часам незвычайных фарматаў – ад форумаў, круглых сталоў, дыялогавых пляцовак, адкрытых размоў са шматдзетнымі сем’ямі да ўзнагароджванняў заслужаных бацькоў, сем’яў, а таксама лаўрэатаў дзіцячых творчых конкурсаў і спаборніцтваў, сямейных фестываляў у розных рэгіёнах краіны.
