Галоўныя навіны

Салей заваяваў серабро Паралімпіяды на стаметроўцы батэрфляем

Дзмітрый Салей. Фота Мінспорту

8 верасня, Мінск /Кар. БЕЛТА/. Беларускі плывец Дзмітрый Салей стаў прызёрам XVII Паралімпійскіх гульняў у Парыжы, паведамляе карэспандэнт БЕЛТА.

У заключны дзень спаборніцтваў у басейне Салей выступаў на дыстанцыі 100 м батэрфляем у класе S12. Па выніках папярэдніх заплываў раніцай беларус прабіўся далей з трэцім рэзультатам, а ў фінале фінішаваў на другім месцы, паказаўшы час 57,92 сек. Яшчэ адзін наш спартсмен Максім Вашкевіч заняў восьмую пазіцыю.

Сярэбраны медаль Салея стаў для беларускай каманды сёмай узнагародай Паралімпіяды-2024. Раней пяціразовым чэмпіёнам Парыжа стаў Ігар Бокій, яшчэ адно золата дабавіў Ягор Шчалканаў. Усе нашы атлеты завяршылі выступленні на Гульнях, 8 верасня дэлегацыя вяртаецца ў Мінск.

Лукашэнка павіншаваў Дзмітрыя Салея з серабром Паралімпіяды ў Парыжы

8 верасня, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў члена нацыянальнай каманды па паралімпійскіх відах спорту Дзмітрыя Салея з серабром Паралімпіяды ў Парыжы. Аб гэтым БЕЛТА паведамілі ў прэс-службе кіраўніка дзяржавы.

"Шчыра рады, што дзякуючы сваёй упартасці, характару і высокаму спартыўнаму майстэрству ты зноў падняўся на п'едэстал. Малайчына!" - гаворыцца ў віншаванні.

Аляксандр Лукашэнка пажадаў Дзмітрыю Салею моцнага здароўя, дабрабыту і новых дасягненняў.

версія для друку

зрабіць стартавай

дабавіць у выбранае