Галоўныя навіны

Лукашэнка сабраў нараду па гандлі з замежнымі партнёрамі, перш за ўсё на Усходзе

17 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка 17 студзеня сабраў нараду па пытаннях знешнегандлёвай дзейнасці ў 2025 годзе, перадае карэспандэнт БЕЛТА.

У ліку ўдзельнікаў нарады прэм'ер-міністр Раман Галоўчанка, старшыня праўлення Нацыянальнага банка Павел Калаур, дзяржаўны сакратар Савета бяспекі Аляксандр Вальфовіч, міністр абароны Віктар Хрэнін, старшыня КДБ Іван Тэртэль і міністр па надзвычайных сітуацыях Вадзім Сіняўскі.

"Размова пойдзе аб знешнім гандлі Беларусі ў гэтым годзе", - растлумачыў кіраўнік дзяржавы тэматыку мерапрыемства.

"У сувязі з тым, што Захад нібыта не хоча з намі супрацоўнічаць у галіне эканомікі, мы са сваёй прадукцыяй абсалютна не патрэбны, мы гэта добра разумеем - лішняя канкурэнцыя ў галіне аўтамабілебудавання, іншых сфер не ўваходзіць у парадак дня заходніх дзяржаў, - звярнуў увагу Аляксандр Лукашэнка. - Ні для каго не сакрэт, што мы больш за ўсё сёння гандлюем на ўсходнім напрамку, хоць ад Захаду мы не адыходзім канчаткова. Тое, што іх цікавіць і нам выгадна, - гандлюем, прадаём, але не тыя аб'ёмы і не тыя грошы. Таму - усходні напрамак. Расійская Федэрацыя, Кітайская Народная Рэспубліка".

Прэзідэнт расказаў, што каля пяці дзяржаў, уключаючы Пакістан, Інданезію і КНДР, накіравалі Беларусі свае прапановы аб арганізацыі сустрэч на вышэйшым узроўні для абмеркавання пытанняў супрацоўніцтва. "Ёсць прынцыповыя пытанні, па якіх трэба прымаць рашэнні. Гэта датычыцца ўзаемаразлікаў, паставак нашай ваеннай прадукцыі, прадукцыі па барацьбе з пажарамі і гэтак далей. Таму я запрасіў вас для таго, каб абмеркаваць вось гэты спектр і напрамак нашага супрацоўніцтва - тое, што цікавіць перш за ўсё нашых партнёраў на Усходзе", - адзначыў кіраўнік дзяржавы.

"Хоць мы не скажам, што Венесуэла на захадзе не хоча з намі супрацоўнічаць. Вядома, хоча, - прадоўжыў Аляксандр Лукашэнка. - І бізнес-колы многія прапануюць. Нават у ЗША ў іх інтарэс да нашай дзяржавы. Пачакаем. Мы вядзём з імі дыялог, перагаворы з Захадам па напрамках, якія нас цікавяць. Дамовімся - будзем супрацоўнічаць. Але ў аснове павінны ляжаць нашы інтарэсы, нашай дзяржавы, і прыярытэты, якія мы вызначылі".

На нарадзе, паводле слоў Прэзідэнта, плануецца абмеркаваць комплекс пытанняў знешнегандлёвай дзейнасці "ў праламленні на канкрэтныя дзяржавы".

"Чаго тут утойваць. Сірыя нам прапануе супрацоўніцтва, просіць, каб нашы службовыя асобы прыехалі перагаварыць, вызначыцца. Афганістан таксама зацікаўлены ў нашай прадукцыі. Няпростая сітуацыя ў абедзвюх дзяржавах, - сказаў беларускі лідар. - Я не называю іншыя, афрыканскія, дзяржавы, каб тут нашы "сокалы" не наляцелі на іх і не пачалі ціснуць. Але дзясятак дзяржаў, якія з задавальненнем гатовы з намі супрацоўнічаць. Нам гэта трэба? Трэба. Ці зможам мы задаволіць іх запыты? Цяжка сказаць, не такая ў нас гіганцкая эканоміка, але будзем рухацца".

версія для друку

зрабіць стартавай

дабавіць у выбранае