25 мая, Масква /Кар. БЕЛТА/. Прэзідэнт Беларусі Аляксандр Лукашэнка ў Крамлі прымае ўдзел у пасяджэнні Вышэйшага Еўразійскага эканамічнага савета, перадае карэспандэнт БЕЛТА.
Гэта пасяджэнне з'яўляецца юбілейным - трыццатым. У час саміту разгледзяць ход выканання рашэнняў па стратэгічных напрамках развіцця еўразійскай эканамічнай інтэграцыі, падвядуць вынікі міжнароднай дзейнасці саюза.
Лідары краін спачатку праводзяць пасяджэнне савета ў вузкім складзе, а пасля - у пашыраным з удзелам запрошаных высокіх гасцей. Сярод іх Прэзідэнт Азербайджана Ільхам Аліеў, які ўпершыню будзе прысутнічаць на пасяджэнні ВЕЭС. Па відэасувязі да лідараў краін далучацца прэзідэнты Узбекістана і Таджыкістана Шаўкат Мірзіёеў і Эмамалі Рахмон. У фармаце відэазвароту плануецца выступленне з прывітальным словам Прэзідэнта Рэспублікі Куба Мігеля Дыяс-Канеля Бермудэса.
Запрошаны таксама генеральны сакратар СНД Сяргей Лебедзеў, генеральны сакратар ШАС Чжан Мін, дзяржаўны сакратар Саюзнай дзяржавы Дзмітрый Мезенцаў. Чакаецца, што Вышэйшы савет падпіша пратакол аб унясенні змяненняў у Дагавор аб ЕАЭС у частцы аказання фінансавага садзейнічання пры рэалізацыі дзяржавамі ЕАЭС сумесных кааперацыйных праектаў у галінах прамысловасці, а таксама пакет паправак у Дагавор аб ЕАЭС - так званы III Вялікі пратакол.
Кіраўнікам дзяржаў плануецца прадставіць даклады аб рэалізацыі асноўных напрамкаў міжнароднай дзейнасці ЕАЭС у 2022 годзе, а таксама аб рэалізацыі стратэгіі-2025 і інфармацыю аб выніках праведзенай у 2022 годзе работы па пытаннях натуральных манаполій.
Вышэйшы савет абмяркуе рэалізацыю падыходаў да развіцця гандлёва-эканамічнага супрацоўніцтва з асноўнымі партнёрамі ЕАЭС на сярэднетэрміновую перспектыву па выніках мінулага года, планаў лібералізацыі па асобных сектарах паслуг у рамках ЕАЭС, вынікі маніторынгу выканання дзяржавамі палажэнняў, прадугледжаных правіламі рэгулявання гандлю паслугамі, заснавання і дзейнасці.
Акрамя таго, лідары краін ЕАЭС плануюць разгледзець змяненні ў рэгламент работы ЕЭК і іншыя пытанні.