Галоўныя навіны

7 красавіка, Мінск /Кар. БЕЛТА/. Агенцтва касмічных даследаванняў створана ў Беларусі, паведаміў журналістам кіраўнік апарату Нацыянальнай акадэміі навук Беларусі акадэмік Пётр Віцязь, перадае карэспандэнт БЕЛТА.

"Асноўная задача такога агенцтва - арганізаваць усе віды работ па гэтым напрамку", - сказаў Пётр Віцязь.

Работа агенцтва накіравана на рэалізацыю мерапрыемстваў па вядзенні адзінай дзяржаўнай палітыкі ў гэтай галіне, выкананне мерапрыемстваў па прадстаўленні рэспублікі на міжнароднай арэне, а таксама рэалізацыю мерапрыемстваў па эксплуатацыі і мадэрнізацыі існуючых сістэм і распрацоўцы планаў і задач па стварэнні новага спадарожніка, удакладніў кіраўнік апарату Нацыянальнай акадэміі навук. Акрамя таго, новая структура будзе займацца пытаннямі каардынацыі міжнароднага навукова-тэхнічнага супрацоўніцтва (Беларуссю падпісаны ўжо пагадненні з Расіяй, Украінай і Казахстанам).

"Можна гаварыць, што ў Беларусі створана галіна, якая паспяхова развіваецца. Даследаванні і распрацоўкі, якія ўжо ёсць, з'яўляюцца лакаматывам для многіх галін. Таму сёння асноўная задача не толькі стварыць спадарожнік і эксплуатаваць яго. Задача агенцтва - каардынаваць і накіроўваць, выходзіць на знешнія рынкі", - адзначыў Пётр Віцязь.