70-годдзе Вялікай Перамогі

"Пачуццё патрыятызму ў савецкіх людзей у гады Вялікай Айчыннай вайны дасягнула найвышэйшага напалу. Разуменне таго, што ў іх руках - лёс Айчыны, аб'яднала прадстаўнікоў усіх нацыянальнасцей, усіх слаёў грамадства, - адзначыў Мікалай Шчокін. - На тэрыторыі Беларусі разгарнуўся самы масавы рух супраціўлення за ўвесь перыяд Другой сусветнай вайны. Народ згуртаваўся перад пагрозай прыгнёту і фізічнага знішчэння, праявіў стойкасць, мужнасць і самаахвяраванне. Жорсткасці і вандалізму агрэсара беларусы проціпаставілі чалавечнасць і веліч духу. Перамога ў Вялікай Айчыннай вайне - гэта перш за ўсё трыумф патрыятызму, які і праз 70 гадоў не страчвае свайго грандыёзнага значэння".

Паводле яго слоў, нельга дапусціць гістарычнай несправядлівасці і аддаць забыццю вялікі подзвіг старэйшага пакалення і яго вялікую ахвярнасць. "У нас ёсць усе падставы ганарыцца сваім народам - народам, які перамог фашызм, адстаяў незалежнасць сваёй краіны і краін Еўропы і ператварыў Беларусь у сацыяльна і індустрыяльна развітую, моцную, незалежную дзяржаву, - лічыць Мікалай Шчокін. - Атрафія гістарычнай памяці блізкая да страты нацыянальнай гордасці. Наш свяшчэнны абавязак у тым, каб процістаяць крывадушнасці, двайным стандартам, скажэнню бясспрэчных фактаў і падзей".

Субяседнік падкрэсліў, што перагляд вынікаў Другой сусветнай вайны прывёў да адраджэння неафашысцкай ідэалогіі на Захадзе. "Наіўна думаць, што адкрытая фальсіфікацыя гісторыі Вялікай Айчыннай вайны, гераізацыя фашысцкіх памагатых закранае толькі розумы моладзі і не аказвае негатыўнага ўплыву на астатніх грамадзян. Сацыялагічныя даследаванні паказваюць, што няма прынцыповай розніцы ў іерархіі каштоўнасцей у моладзі і астатняй часткі грамадства. Значыць, патрыятычнае выхаванне - гэта не толькі маладзёжная палітыка, а агульнадзяржаўная задача, накіраваная за замацаванне гістарычнай праўды аб Вялікай Перамозе ў нацыянальнай свядомасці беларусаў", - рэзюмаваў Мікалай Шчокін.