500-годдзе беларускага кнігадрукавання

5 мая, Мінск /Кар. БЕЛТА/. Нацыянальная бібліятэка Беларусі перадала ў дар камплекты факсімільнага выдання "Кніжная спадчына Францыска Скарыны" бібліятэкам Літвы. Аб гэтым карэспандэнту БЕЛТА паведамілі ў НББ.

У Нацыянальнай бібліятэцы Літвы імя М. Мажвідаса 4 мая адбыўся круглы стол "Францыск Скарына. 500-годдзе кнігадрукавання ў Беларусі і Літве", дзе дырэктар Нацыянальнай бібліятэкі Беларусі Раман Матульскі правёў прэзентацыю і перадаў у дар камплекты факсімільнага выдання "Кніжная спадчына Францыска Скарыны" Нацыянальнай бібліятэцы Літвы імя М. Мажвідаса, бібліятэцы Акадэміі навук Літвы імя Урублеўскіх, бібліятэцы Вільнюскага ўніверсітэта і бібліятэцы Вільнюскай гімназіі імя Ф.Скарыны. Кіраўнікі і прадстаўнікі літоўскіх бібліятэк выказалі словы ўдзячнасці за каштоўны падарунак банку БелВЭБ і Нацыянальнай бібліятэцы Беларусі, якія з'яўляюцца ініцыятарамі і асноўнымі выканаўцамі агульнанацыянальнага выдавецкага праекта "Кніжная спадчына Францыска Скарыны".

Праект па факсімільным перавыданні кніжнай спадчыны Францыска Скарыны стартаваў у 2013 годзе: 22 красавіка паміж Нацыянальнай бібліятэкай Беларусі і Банкам БелВЭБ было падпісана пагадненне аб рэалізацыі праграмы па факсімільным выданні кніг Францыска Скарыны. Гэта пагадненне дало магчымасць аб'яднаць патэнцыял дзвюх арганізацый для дасягнення агульнай мэты - сабраць электронныя копіі разгрупаваных па ўсім свеце экзэмпляраў выданняў Францыска Скарыны і аднавіць іх да 2017 года ў выглядзе адзінай калекцыі факсімільных выданняў.

"З моманту падпісання пагаднення кожны з саарганізатараў - НББ і Банк БелВЭБ - дзейнічаючы сумесна, імкнуліся найбольш эфектыўна выкарыстаць свой патэнцыял для дасягнення мэты. Як вынік, у 2017-м - у год святкавання 500-годдзя беларускага кнігадрукавання - праграма, разлічаная на пяцігадовы тэрмін, падыходзіць да завяршэння", - адзначылі ў бібліятэцы.