Год гістарычнай памяці

Лукашэнка: крыніца беларускіх каштоўнасцей - гістарычная памяць

28 студзеня, Мінск /Кар. БЕЛТА/. Крыніца беларускіх каштоўнасцей - гістарычная памяць. Аб гэтым Прэзідэнт Беларусі Аляксандр Лукашэнка заявіў у Пасланні беларускаму народу і Нацыянальнаму сходу, перадае карэспандэнт БЕЛТА.

"Крыніца нашых каштоўнасцей - гістарычная памяць. У складаных умовах загартаваліся нашы шматвяковыя духоўна-маральныя арыенціры, сфарміраваўся сапраўдны беларускі характар. Сёння мы больш гаворым аб Вялікай Айчыннай вайне, але гэта не азначае забыццё або непрыманне іншых этапаў развіцця нашай дзяржаўнасці. На працягу бягучага года мы павінны да гэтага вярнуцца, каб паказаць усім, а асабліва нашым дзецям і моладзі, - хто мы і адкуль, што мы прайшлі і колькі страцілі чалавечых жыццяў, імкнучыся да нашай незалежнасці", - падкрэсліў ён.

Паводле слоў кіраўніка дзяржавы, менавіта таму бягучы год аб'яўлены Годам гістарычнай памяці. Ён насычаны знакавымі для Беларусі датамі і юбілеямі, звязанымі з гісторыяй, навукай, культурай. Погляды і версіі, якія насаджваюцца, не павінны закрываць памяць аб мінулым.

"Паглядзіце, як скажаецца гісторыя ў бліжэйшых суседзяў. На вуліцах еўрапейскіх сталіц, вызваленых Чырвонай Арміяй, праходзяць маршы малойчыкаў з фашысцкай свастыкай, нацыстаў шануюць як герояў, арганізуюць факельныя шэсці ў іх гонар, зносяць помнікі савецкім воінам-вызваліцелям. Ці маглі мы ўявіць такое некалькі дзясяткаў гадоў таму?" - задаў рытарычнае пытанне Прэзідэнт.

версія для друку

зрабіць стартавай

дабавіць у выбранае