Прамовы і інтэрв’ю

Шпулер: для "Штадлер Мінск" вельмі важны заказ сталічнага метрапалітэна

18 верасня, Мінск /Кар. БЕЛТА/. Для прадпрыемства "Штадлер Мінск" вельмі важны заказ сталічнага метрапалітэна, заявіў у час сустрэчы з першым намеснікам прэм'ер-міністра Беларусі Аляксандрам Турчыным старшыня адміністрацыйнага савета, уладальнік кампаніі "Штадлер Рэйл Груп" Петэр Шпулер, перадае карэспандэнт БЕЛТА.

"Заказ Мінскага метрапалітэна - вельмі важны для нашага прадпрыемства "Штадлер Мінск". Мы ганарымся, што ў нас ёсць першыя паязды метро, якія паставім у бліжэйшы час. Прыемна, што іх не толькі зрабілі, але і распрацавалі ў Беларусі на нашым прадпрыемстве. Метро - важны напрамак для нас. Мы бачым перспектывы ў пастаўках вагонаў на рынак СНД і Цэнтральнай Еўропы", - сказаў Петэр Шпулер.

Асаблівасць новых саставаў - у аўтаматычным кіраванні. "Гэта незвычайная тэхналогія нават для Заходняй Еўропы. У канцы лістапада мы гатовы прадэманстраваць гэтыя магчымасці на практыцы на другой лініі метро ў Мінску", - адзначыў старшыня адміністрацыйнага савета.

Паводле слоў Аляксандра Турчына, сёння ў час сустрэчы будуць абмяркоўвацца праекты, якія ўжо рэалізуюцца і толькі плануюцца на тэрыторыі Беларусі. "Адно з важных для мяне пытанняў - правядзенне ў лістападзе маштабнага беларуска-швейцарскага дзелавога форуму. З улікам даволі інтэнсіўнага развіцця двухбаковых адносін я надаю вельмі вялікае значэнне гэтаму мерапрыемству і хачу прасіць вас аб падтрымцы ў яго правядзенні", - звярнуўся ён да Петэра Шпулера.

Завод "Штадлер Мінск" быў афіцыйна адкрыты 20 лістапада 2014 года. Прадпрыемства ўваходзіць у склад швейцарскай кампаніі "Штадлер Рэйл Груп", якая ўжо больш як 75 гадоў з'яўляецца адным з вядучых еўрапейскіх вытворцаў чыгуначнага рухомага саставу. "Штадлер Рэйл Груп" мае таксама філіялы ў Аўстрыі, Аўстраліі, Алжыры, Вялікабрытаніі, Швейцарыі, Германіі, Нідэрландах, Венгрыі, Польшчы, Чэхіі, Італіі і ЗША.

версія для друку

зрабіць стартавай

дабавіць у выбранае