Прамовы і інтэрв’ю

Шаўцоў: Беларускі Чырвоны Крыж гатовы аператыўна аказаць дапамогу эвакуіраваным з Газы беларусам

17 лістапада, Мінск /Кар. БЕЛТА/. Беларускі Чырвоны Крыж гатовы аператыўна аказаць дапамогу эвакуіраваным з Газы беларусам. Аб гэтым заявіў карэспандэнту БЕЛТА генеральны сакратар Беларускага Чырвонага Крыжа Дзмітрый Шаўцоў.

"Каманда Беларускага Чырвонага Крыжа напярэдадні ноччу сустракала борт з эвакуіраванымі з Газы беларусамі ў Нацыянальным аэрапорце Мінск. Усяго мы сустрэлі 41 чалавека, з іх 19 дзяцей ва ўзросце да 18 гадоў, у іх ліку адно немаўля, - расказаў Дзмітрый Шаўцоў. - Вялася першасная ацэнка патрэбнасцей. Дарослым і дзецям перададзена гуманітарная дапамога - цёплае адзенне, пледы, прадметы гігіены, а таксама прадуктовыя наборы. Аказвалася псіхалагічная падтрымка. Супрацоўнікамі арганізацыі ў тым ліку вялося транспартнае суправаджэнне эвакуіраваных грамадзян да месцаў размяшчэння".

Пры звяртанні ў тэрытарыяльныя арганізацыі Беларускага Чырвонага Крыжа з эвакуіраванымі з Газы беларусамі будзе весціся далейшая комплексная работа па падтрымцы. "Мы раздалі ўсім прыбыўшым анкеты для ацэнкі патрэбнасцей. Цяпер вядзецца маніторынг сітуацыі. Магу запэўніць, што Беларускі Чырвоны Крыж гатовы аператыўна аказаць дапамогу ўсім эвакуіраваным з Газы беларусам", - дадаў Дзмітрый Шаўцоў.

Як паведамлялася раней, за беларусамі і членамі іх сем'яў быў адпраўлены гуманітарны рэйс "Белавія" з медыкамі і псіхолагамі з Рэспубліканскага атрада спецыяльнага прызначэння МНС "ЗУБР" на борце. Пасля прыбыцця яны аказалі неабходную дапамогу як дарослым, так і дзецям. Сёння ўночы самалёт паспяхова прызямліўся ў Мінску.

версія для друку

зрабіць стартавай

дабавіць у выбранае