Прамовы і інтэрв’ю
Максімум намаганняў, нестандартныя падыходы: Крупко аб выкананні пастаўленых перад Гомельскай вобласцю задач
29 красавіка, Гомель /Кар. БЕЛТА/. Кожны на сваім рабочым месцы - ад маладога спецыяліста да кіраўніка - павінен усведамляць ступень адказнасці, прыкладаць максімум намаганняў і шукаць нестандарныя падыходы і рашэнні для выканання пастаўленых задач. Акцэнт на гэтым зрабіў старшыня Гомельскага аблвыканкама Іван Крупко 29 красавіка на пасяджэнні аблвыканкама, перадае карэспандэнт БЕЛТА.
Асноўным пытаннем сталі вынікі сацыяльна-эканамічнага развіцця вобласці ў студзені - сакавіку. Перад абмеркаваннем тэмы губернатар яшчэ раз звярнуў увагу на тыя задачы, якія 28 красавіка паставіў перад актывам вобласці Прэзідэнт Аляксандр Лукашэнка. "Галоўнае: кадры і дысцыпліна. Вось так проста і адначасова складана. Кадры - гэта мы ўсе. Гэта тыя, каго мы ставім на ключавыя кіруючыя пасады, з каго фарміруем рэзерв, каго вучым, выхоўваем. У тым ліку сабе на змену", - сказаў Іван Крупко.
Ён падкрэсліў, што кожны павінен разумець адказнасць за свой участак работы: "Ад маладога спецыяліста, якога мы з вамі павінны так сустрэць на першым рабочым месцы, каб у яго і думак не было шукаць, дзе лепш, да рабочых масавых спецыяльнасцей, у якіх павінны быць і камфортныя ўмовы работы, і дастойная зарплата. Аж да кіраўнікоў рознага ўзроўню, якія атрымліваюць нядрэнныя зарплаты, але часам пасуюць перад цяжкасцямі і мяняюць работу, ледзь толькі сутыкнуўшыся з праблемай, што патрабуе нейкіх намаганняў для вырашэння".
Губернатар адзначыў і моманты, на якія звярнуў увагу Прэзідэнт у сельскай гаспадарцы: развіваць культуру земляробства, тэхналагічную і працоўную дысцыпліну, правесці "рамонт" палёў - дзе трэба падсеяць або перасеяць культуры.
"У нас ёсць гаспадаркі, якія спецыялізуюцца на вырошчванні агародніны. І хіба не мае рацыю Прэзідэнт, калі абураўся, што мы не можам накарміць краіну агуркамі і памідорамі па нармальнай цане!" - сказаў Іван Крупко, даручыўшы адказным прапрацаваць і ўнесці адпаведныя прапановы.
Яшчэ адзін ключавы напрамак - рэалізацыя інвестпраектаў па праграме "Адзін раён - адзін праект". "Прэзідэнт даў дакладна зразумець: патрэбны інавацыйныя праекты, валаёмістыя, каб на выхадзе была прадукцыя з высокай дабаўленай вартасцю. Вось нам усім задача", - падкрэсліў губернатар.
Гаворачы ў цэлым аб выкананні пастаўленых перад вобласцю задач, Іван Крупко: "Для сябе ўчора запісаў за Прэзідэнтам: няма ніякіх аб'ектыўных прычын для невыканання пастаўленых задач. І вы гэта запішыце і запамятайце. Адгаворка "па аб'ектыўных прычынах" не прымаецца. Значыць, не прыклалі максімум намаганняў, не шукалі нестандартныя рашэнні і падыходы".
"У сваім Пасланні беларускаму народу і Нацыянальнаму сходу кіраўнік дзяржавы адзначыў: калі хочам жыць лепш, то ўжо ў гэтым годзе мы павінны выканаць усё, што намецілі, спрацаваць лепш, чым у мінулым годзе. Задачы для кожнай галіны мы вызначылі яшчэ ў пачатку года. Аднак ужо цяпер зразумела, што не ўсе рэзервы задзейнічаны", - рэзюмаваў старшыня аблвыканкама.
версія для друку
зрабіць стартавай
дабавіць у выбранае