Прамовы і інтэрв’ю

18 снежня, Мінск /Міхаіл Маціеўскі - БЕЛТА/. Прэзідэнт Беларусі, прэзідэнт Нацыянальнага алімпійскага камітэта Аляксандр Лукашэнка сёння на нарадзе аб развіцці летніх відаў спорту падкрэсліў недапушчальнасць выкарыстання забароненых методык і допінгу пры падрыхтоўцы спартсменаў, перадае карэспандэнт БЕЛТА.

"Хачу папярэдзіць: ніякіх забароненых методык і прэпаратаў! Гэта трэба выключыць раз і назаўсёды, тым больш за гэта прадугледжана крымінальная адказнасць, - заявіў Аляксандр Лукашэнка. - Адзін антыдопінгавы скандал - і церпіць уся краіна і ўсе віды спорту. Вы ведаеце, як тады пільна за гэтым назіраюць".

Як звярнуў увагу кіраўнік дзяржавы, асобныя краіны, у тым ліку Беларусь, знаходзяцца пад пільнай увагай адпаведных міжнародных структур.

На нарадзе Прэзідэнт пацікавіўся, як сёння наладжана медыцынскае і навукова-метадычнае суправаджэнне спорту. "У сакавіку будучага года мы адкрываем новы будынак Рэспубліканскага навукова-практычнага цэнтра спорту, - сказаў Аляксандр Лукашэнка. - Ад яго павінна быць аддача, гэта не павінна быць нейкае чарговае прыстанішча для асобных спартсменаў і чыноўнікаў".