Прамовы і інтэрв’ю

Грамада: у рамках кінафестывалю "Лiстапад" будзе абмяркоўвацца сумесная вытворчасць фільмаў у СНД

13 лістапада, Мінск /Кар. БЕЛТА/. У рамках кінафестывалю "Лiстапад" запланавана пасяджэнне рабочай групы па кінематаграфіі краін - удзельніц СНД, на якім будуць абмяркоўвацца пытанні стварэння сумеснай кінематаграфічнай прасторы. Аб гэтым у час прэс-канферэнцыі ў Нацыянальным прэс-цэнтры паведаміў першы намеснік міністра культуры Рэспублікі Беларусь Валерый Грамада, перадае карэспандэнт БЕЛТА.

"Пытанні стварэння агульнай кінематаграфічнай прасторы будуць абмеркаваны ў рамках кінафестывалю на пляцоўцы СНД. Адбудзецца пасяджэнне рабочай групы па кінематаграфіі краін - удзельніц СНД, дзе плануецца разгледзець пытанні сумеснага пракату і фільмавытворчасці", - сказаў Валерый Грамада.

Ён таксама адзначыў, што праграму кінафестывалю бягучага года вызначае тое, што прысланыя на конкурс работы ў многім накіраваны на папулярызацыю традыцыйных духоўных каштоўнасцей, многія з якіх на постсавецкай прасторы - агульныя. У прыватнасці, беларускае і расійскае кіно грунтуецца на прынцыпах гуманізму і маралі, закладзеных яшчэ ў савецкі час. Дарэчы, у бягучым годзе на кінафестываль паступіла больш за 2 тыс. заявак з 107 краін. "Гэта сведчыць пра аўтарытэт Мінскага міжнароднага кінафестывалю "Лістапад", - упэўнены Валерый Грамада.

Міжнародны кінафестываль "Лiстапад" - буйнейшы кінафорум Беларусі, які традыцыйна праходзіць у Мінску ў лістападзе. Адна з яго важнейшых задач - захаванне адзінай кінематаграфічнай прасторы Беларусі з Расіяй і іншымі краінамі СНД.

версія для друку

зрабіць стартавай

дабавіць у выбранае