Падзеі, факты, анонсы

"З казачнымі памочнікамі знайсці Дзеда Мароза": праграму для ўсёй сям'і падрыхтавалі ў Белавежскай пушчы

Фота з архiва

15 лістапада, Мінск /Кар. БЕЛТА/. Казачная святочная інтэрактыўная праграма для ўсёй сям'і "Алгарытмы Новага года" пройдзе ў рэзідэнцыі беларускага Дзеда Мароза ў Белавежскай пушчы, паведамілі БЕЛТА ў Нацыянальным парку.

"У чароўным маёнтку Дзеда Мароза, дзе заснежаныя елкі пераліваюцца святочнымі агеньчыкамі, надыходзіць час чараўніцтва. Але ў гэтым годзе ўсё не так, як раней. За ўсімі сочыць СняжОК - новы віртуальны памочнік, створаны для кіравання святочнымі працэсамі. Аднак радасць ад аўтаматызацыі хутка змяняецца трывогай: сапраўдны Дзед Мароз знікае. Дзеці і дарослыя, якія прывыклі да цудоўных гульняў і добрых казак, пачынаюць заўважаць, што навагодняе чараўніцтва знікае на вачах, - расказалі пра асаблівасці сюжэта новай праграмы ў нацпарку. - Ці змогуць госці разам з казачнымі памочнікамі прайсці праз усе выпрабаванні і вярнуць Дзеда Мароза, каб выратаваць навагодняе свята?"

Кожны ўдзельнік павінен будзе паспрабаваць разгадаць галаваломкі і знайсці страчаныя элементы чараўніцтва: шчырыя эмоцыі, сяброўства і цеплыню сэрцаў, якія штучны інтэлект не можа ўзнавіць. Паводле задумкі арганізатараў, у працэсе квеста дзеці вучацца цаніць сапраўднае чараўніцтва, якое ідзе ад людзей. У фінале героі знаходзяць сапраўднага Дзеда Мароза, закрытага ў віртуальным свеце. Аб'яднаўшы свае сілы, яны аднаўляюць магію свята.

Як дадалі ў нацпарку, у рамках маючай адбыцца навагодняй праграмы ў Белавежскую пушчу 7 снежня вернуцца Снягурка і яе сям'я. Яны будуць дапамагаць Дзеду Марозу ў маёнтку на працягу трох месяцаў.

"Прыездам казачнай гераіні ў пушчы адкрываецца зімовы турыстычны сезон, гэта падзея стане гучнай і святочнай, - паабяцалі арганізатары. - Так, 7 снежня ў маёнтку пройдуць фестываль самадзейнасці "Агні зімы" і фестываль аніматараў "Добрыя чараўнікі". Артысты будуць выступаць на адкрытай пляцоўцы маёнтка Дзеда Мароза ў рэжыме нон-стоп.

У праграме казачны інтэрактыўны сюжэт, новыя анімацыйныя персанажы, прыезд Снягурачкі, Матухны Зімы і дачок Дзеда Мароза, фестывальны складнік. Будуць працаваць чароўныя лакацыі, тэматычныя фотазоны, генератары пару і снегу. Абяцаны гукавое і светлавое суправаджэнне, карагоды, квесты, гульні, галаваломкі і танцы вакол навагодняй ёлкі, урачыстая цырымонія запальвання навагодніх агнёў.

версія для друку

зрабіць стартавай

дабавіць у выбранае