10 красавіка, Магілёў /Кар. БЕЛТА/. Выстава копій фрэскавага жывапісу XII-XIV стагоддзяў "Вобраз. Традыцыя. Час" пачынае работу 10 красавіка ў Магілёўскім абласным мастацкім музеі імя П.В.Масленікава. Аб гэтым карэспандэнту БЕЛТА паведаміла дырэктар установы культуры Алена Баброва.
"У экспазіцыю ўвайшлі фрагменты фрэсак унікальных помнікаў старажытнарускага дойлідства - Спаса-Праабражэнскай царквы ў Полацку, храма Раства Багародзіцы і Спаса-Праабражэнскай царквы ў Пскове, - адзначыла дырэктар. - Гэта выключныя экспанаты з пункту гледжання трактоўкі евангельскіх сюжэтаў і ілюстрацыі духоўнага жыцця чалавека часоў Старажытнай Русі. Цяпер у нашых наведвальнікаў ёсць магчымасць наглядна азнаёміцца з гісторыяй рэдкіх артэфактаў і пранікнуцца атмасферай мінулай эпохі".
Паводле слоў Алены Бабровай, гэты выставачны праект у многім адбыўся дзякуючы дзейнасці студэнтаў Беларускай дзяржаўнай акадэміі мастацтваў. Копіі фрэсак былі выкананы ў час іх творчай экспедыцыі ў 1980-я гады. З таго часу экспанаты пачалі свой шлях па-за сценамі старажытных храмаў і цэркваў, знаходзячы новае прачытанне ў выставачных цэнтрах, музеях і галерэях.