Падзеі, факты, анонсы

15 сакавіка, Мінск /Кар. БЕЛТА/. Урачыстая цырымонія ўзнагароджання 42 пераможцаў Х Рэспубліканскага конкурсу "Жанчына года-2017" адбудзецца 17 сакавіка ў Мінску, паведамілі карэспандэнту БЕЛТА ў ГА "Беларускі саюз жанчын".

"Жанчыны арыентаваны на фарміраванне моцных сямейных сувязей, клопат пра здароўе сваіх блізкіх, стабільнасць у грамадстве. Важна паказаць гэту ролю, уклад жанчын у выхаванне падрастаючага пакалення, сацыяльна-эканамічнае, гуманітарнае развіццё краіны, культуру і духоўнасць. Гэта адна з важных задач нашай арганізацыі, - адзначыла намеснік старшыні Савета Рэспублікі Нацыянальнага сходу, старшыня ГА "БСЖ" Мар'яна Шчоткіна. - Таму кожны год мы праводзім гэты конкурс, цяперашні ўжо дзясяты па ліку. Да юбілею крыху змянілі фармат, дабавілі новыя намінацыі - каб паказаць шматграннасць ролі жанчын у грамадстве".

Перш за ўсё Мар'яна Шчоткіна адзначыла намінацыю "Лідарства і паспяховае кіраўніцтва", якая прызначана паказаць, што жанчына можа быць паспяховай, сумяшчаючы клопат пра сям'ю і кар'еру. У гэтай намінацыі адзначаны 8 жанчын-кіраўнікоў устаноў аховы здароўя і сацыяльнай сферы, прадпрыемстваў, мясцовых органаў выканаўчай улады - усе актывісткі "БСЖ". У ліку лаўрэатаў не толькі па адной прадстаўніцы ад кожнага рэгіёна (ад Мінска - дзве), але і актывістка аб'яднанай арганізацыі грамадства ААТ "ААБ Беларусбанк".

Сем прадстаўніц сферы медыцыны, якія таксама з'яўляюцца валанцёрамі, донарамі, сталі пераможцамі ў намінацыі "Ратуючы жыцці". Яшчэ 7 таленавітых жанчын-вучоных, даследчыкаў адзначаны званнем "Жанчына ў навуцы", каб у Год навукі паказаць іх высокія дасягненні ў сваёй сферы.

Адна з галоўных роляў жанчыны ўвасобілася ў традыцыйнай намінацыі "Мацярынская слава". Прычым сярод сямі пераможцаў не толькі шматдзетныя маці, бацькі-выхавальнікі прыёмных дзяцей, але і маці выдатных беларусаў. "Што такое для маці слава? Гэта поспехі яе дзіцяці, якое дабіваецца большага, калі ёсць падтрымка бацькоў. Гэта мы і імкнуліся паказаць, выбіраючы пераможцаў у намінацыі", - растлумачыла Мар'яна Шчоткіна.

Шэсць жыхарак рэгіёнаў Беларусі, якія ўнеслі значны ўклад у адраджэнне вёскі, развіццё сельскагаспадарчай вытворчасці і перапрацоўку прадукцыі, аграэкатурызму, сацыяльнай інфраструктуры і мясцовага самакіравання, адзначаны ў намінацыі "Жанчына вёскі".

У намінацыі "Духоўнасць і культура" пераможцамі названы 7 выдатных дам, якія ўнеслі важкі ўклад у развіццё духоўна-маральнага патэнцыялу грамадства, выхаванне дзяцей і моладзі, захаванне гістарычных і культурных каштоўнасцей, якія займаюцца дабрачыннай дзейнасцю. Сярод іх кіраўнік мастацкага калектыву, паэтэса, старшыня папячыцельскага савета дзіцячага хоспіса.

Для кожнай намінанткі важнай узнагародай стане тое, што разам з ганаровым званнем яны атрымаюць частку сумы ад прэміі "За духоўнае адраджэнне". Па выніках 2017 года прэміі было ўдастоена ГА "БСЖ" - за шматгадовую гуманітарную дзейнасць.