Падзеі, факты, анонсы

28 снежня, Мінск /Аліна Грышкевіч - БЕЛТА/. Мастацкая выстава "Сны пра Францыю" пройдзе ў Мінску з 18 студзеня па 10 лютага, паведамілі карэспандэнту БЕЛТА ў пасольстве Францыі ў Беларусі.

У праекце прымуць удзел 24 беларускія сучасныя мастакі, работы якіх выкананы ў розных жанрах: жывапісе, скульптуры, графіцы, фатаграфіі, кераміцы, тэкстылі. Усе яны будуць прысвечаны французскай тэматыцы. Экспазіцыю праводзіць міжнароднае грамадскае аб'яднанне "Саюз майстроў-міратворцаў" пры падтрымцы пасольства Французскай Рэспублікі ў Мінску.

Акрамя таго, у адпаведнасці з праектам прадугледжана адукацыйная праграма, якая ўключае майстар-класы, экскурсіі. Выстава будзе арганізавана ў арт-гасцёўні "Высокае месца".

У французскай дыпламатычнай місіі звярнулі ўвагу на важнасць развіцця культурнага супрацоўніцтва з Беларуссю. Менавіта таму ў адыходзячым годзе было праведзена нямала мерапрыемстваў, якія даюць магчымасць беларускім гледачам бліжэй азнаёміцца з культурай Францыі. Як чакаецца, 2019 год таксама стане насычаным на культурныя сустрэчы.