Падзеі, факты, анонсы

Прэміі ў галіне навукі плануюць уручаць у Саюзнай дзяржаве

Рыгор Рапота

17 ліпеня, Віцебск /Андрэй Шчарбіцкі - БЕЛТА/. Прэміі ў галіне навукі і тэхнікі плануюць уручаць у Саюзнай дзяржаве раз у два гады, паведаміў у час прэс-канферэнцыі дзяржаўны сакратар Саюзнай дзяржавы Рыгор Рапота, перадае карэспандэнт БЕЛТА.

Паводле слоў Рыгора Рапоты, ужо існуюць прэміі ў сферы літаратуры і мастацтва, імі ўзнагароджваюць прадстаўнікоў дзвюх краін на "Славянскім базары". "Цяпер распрацавалі рэгламент новай прэміі - у галіне навукі і тэхнікі. Яе будуць уручаць раз у два гады 2 красавіка ў Дзень яднання народаў Беларусі і Расіі", - адзначыў дзяржсакратар СД.

Ён дадаў, што Пастаянны камітэт Саюзнай дзяржавы заняты пошукам новых праектаў. Цяпер рэалізуецца 12 праграм, гэты спіс трэба як мінімум падтрымліваць на тым жа ўзроўні, але ў ідэале папаўняць. "Цяпер збіраем прапановы па розных напрамках. Гэта касмічная сфера, праекты па развіцці канцэпцыі разумнага горада, праграма па радыяцыйнай бяспецы, ёсць задумы ў развіцці медыцыны. Могуць быць падтрыманы любыя культурныя мерапрыемствы. Для нас культура - гэта сур'ёзны элемент узаемадзеяння паміж нашымі краінамі і народамі", - сказаў Рыгор Рапота.

Сёння на "Славянскім базары" праходзіць Дзень Саюзнай дзяржавы. Ужо адбылося некалькі афіцыйных мерапрыемстваў. У бліжэйшы час у музеі-сядзібе Ільі Рэпіна "Здраўнёва" пройдзе пленэр майстроў мастацкіх рамёстваў Беларусі ў стылі "маляванкі". Тут жа адбудзецца круглы стол на тэму "Дыялог культур і літаратуры ў Саюзнай дзяржаве Беларусі і Расіі".

У 22.00 у Летнім амфітэатры стартуе канцэрт "Саюзная дзяржава запрашае...". У праграме вечара выступленне аркестра "Фанограф-Сімфа-Джаз"пад кіраўніцтвам Сяргея Жыліна, выступленні Дзмітрыя Пяўцова, Яўгена Дзятлава, Алёны Ланской, Ірыны Браціс і іншых. У час канцэрта ўручаць спецыяльныя дыпломы і прызы Пастаяннага камітэта Саюзнай дзяржавы.

XXIX Міжнародны фестываль мастацтваў "Славянскі базар у Віцебску" праходзіць з 16 па 19 ліпеня. Асноўнымі падзеямі форуму стануць Міжнародны конкурс выканаўцаў эстраднай песні "Віцебск-2020" і Міжнародны дзіцячы музычны конкурс "Віцебск-2020".

версія для друку

зрабіць стартавай

дабавіць у выбранае