Падзеі, факты, анонсы
Новая канцэртная пляцоўка можа з'явіцца ў Мінску ў летнім музычна-турыстычным сезоне-2024
Фота з архiва
30 лістапада, Мінск /Кар. БЕЛТА/. Вячэрнія канцэрты для моладзі прапануецца праводзіць у Мінску па суботах у час летняга музычна-турыстычнага сезона-2024. Аб гэтым на пасяджэнні Мінгарвыканкама паведаміў начальнік упраўлення культуры Мінгарвыканкама Віталь Брэль, перадае карэспандэнт БЕЛТА.
Віталь Брэль адзначыў, што летні музычна-турыстычны сезон - праект, які спадабаўся мінчанам і гасцям сталіцы. У бягучым годзе ў гістарычным цэнтры адбылося 25 канцэртаў беларускіх выканаўцаў, 42 спектаклі, літаратурная акцыя з удзелам беларускіх пісьменнікаў. Штодзень праводзіліся бясплатныя экскурсіі па музеях Верхняга горада.
"У 2023 годзе пашырылі колькасць лакацый - мерапрыемствы праходзілі не толькі каля ратушы, але і на тэрыторыі Траецкага прадмесця. Улічваючы запатрабаванасць праекта, прапрацоўваем пытанне добраўпарадкавання дадатковай канцэртнай пляцоўкі каля Палаца спорту ў сезоне 2024 года, дзе па суботах будуць арганізаваны вячэрнія канцэрты для маладзёжных мерапрыемстваў з адпаведным рэпертуарам", - адзначыў Віталь Брэль.
Таксама ён прапанаваў адміністрацыям раёнаў разгледзець магчымасць уладкавання такіх пляцовак у парках культуры і адпачынку.
Летні музычна-турыстычны сезон традыцыйна стартуе ў маі і доўжыцца да сярэдзіны верасня. У гэты час арганізуюць выступленні маладзёжных і дзіцячых калектываў, танцавальныя праграмы і майстар-класы па розных напрамках, кінапаказы open air cinema. У спісе мерапрыемстваў - праекты "Класіка каля ратушы", "Тэатральны дворык", "Бібліятэка пад адкрытым небам", фестываль-кірмаш "Вясновы букет".
Важнай асаблівасцю мінулага летняга музычна-турыстычнага сезона стала правядзенне дзён культуры гарадоў-пабрацімаў Мінска.
версія для друку
зрабіць стартавай
дабавіць у выбранае