Падзеі, факты, анонсы

Мінскі міжнародны Калядны оперны форум пройдзе 10-15 снежня

Фота bolshoibelarus.by

3 снежня, Мінск /Кар. БЕЛТА/. Мінскі міжнародны Калядны оперны форум пройдзе 10-15 снежня, паведамілі БЕЛТА ва ўстанове культуры.

14-ы раз на сцэне Вялікага тэатра пройдзе Мінскі міжнародны Калядны оперны форум.

Адкрые форум лічбавая касмічная опера "Волга Опера" Чувашскага дзяржаўнага тэатра оперы і балета. Упершыню на беларускай сцэне пакажуць спектакль, які поўнасцю перавярнуў уяўленне аб оперы і стаў падзеяй у тэатральнай супольнасці.

Касцюмы і дэкарацыі оперы згенерыраваны нейрасеткай, лібрэта і музыка напісаны з дапамогай штучнага інтэлекту. У адной з галоўных роляў выступае робат-артыст. Опера выконваецца на дзевяці мовах: рускай, чувашскай, англійскай, італьянскай, нямецкай, французскай, японскай, квазіславянскай і санскрыце. Сюжэт уключае адсылкі да папулярных твораў навуковай фантастыкі, філасофскіх прац, камп'ютарных гульняў і анімэ.

За дырыжорскім пультам - кампазітар оперы Рустам Сагдыеў.

11 снежня беларускі глядач пазнаёміцца з оперным рэпертуарам Варонежскага дзяржаўнага тэатра оперы і балета - калектыў запрашае на "Вяселле Фігара" В.А. Моцарта. Гэта адзін з самых яркіх оперных спектакляў у афішы расійскага тэатра.

Пастаноўка была ажыццёўлена ў 2021 годзе дырыжорам народным артыстам Расійскай Федэрацыі Феліксам Корабавым і рэжысёрам Міхаілам Бычковым. Дзеянне перанесена ў адну з еўрапейскіх дзяржаў, уцягнутых у тэатр ваенных дзеянняў Першай сусветнай ХХ стагоддзя. Падзеі развіваюцца на стыку заканчэння вайны і вяртання да мірнага жыцця.

У 2022 годзе спектакль "Вяселле Фігара" быў прадстаўлены адразу ў шасці намінацыях расійскай Нацыянальнай тэатральнай прэміі "Залатая маска".

За дырыжорскім пультам - Цімур Абсалуцінаў (Расія).

12 снежня пройдзе другі паказ прэм'ернай пастаноўкі оперы П. Чайкоўскага "Яўген Анегін". Пастановачную групу ўзначальваюць галоўныя спецыялісты тэатра: дырыжор Арцём Макараў і рэжысёр Ганна Маторная.

14 снежня гледачы ўбачаць казачную оперу "Турандот". Галоўныя партыі ў беларускай пастаноўцы выканаюць запрошаныя зоркі оперы: Алена Міхайленка (Маскоўскі музычны тэатр "Гелікон-опера"), Міхаіл Пірагоў (Міхайлаўскі тэатр, Санкт-Пецярбург), Лізавета Кулагіна (Маскоўскі музычны тэатр "Гелікон-опера"). Дырыжор - галоўны дырыжор Вялікага тэатра Беларусі, народны артыст Башкортастана Арцём Макараў.

Завершыць Калядны форум гала-канцэрт 15 снежня. Сапраўдныя оперныя "хіты" прагучаць у гэты вечар у выкананні пераможцаў і ўдзельнікаў конкурсаў Алены Абразцовай. За дырыжорскім пультам - Васіль Юркевіч (Расія).

версія для друку

зрабіць стартавай

дабавіць у выбранае