Падзеі, факты, анонсы
Маладзёжны беларуска-расійскі аркестр пад кіраўніцтвам Башмета дасць канцэрты ў Мінску і Маскве
Фота з архiва
30 верасня, Масква /Эдуард Півавар - БЕЛТА/. Канцэрты абноўленага складу Маладзёжнага беларуска-расійскага сімфанічнага аркестра пад кіраўніцтвам народнага артыста СССР, Героя працы Расійскай Федэрацыі Юрыя Башмета пройдуць у Мінску і Маскве. 4 кастрычніка калектыў выступіць у Вялікай зале Маскоўскай кансерваторыі, 6 кастрычніка - у Вялікай канцэртнай зале Беларускай дзяржаўнай філармоніі, паведамілі БЕЛТА ў Пастаянным камітэце Саюзнай дзяржавы.
У складзе аркестра - 90 лепшых маладых музыкантаў з Беларусі і Расіі, якія прайшлі конкурснае праслухоўванне. Як адзначае Юрый Башмет, гэты праект вельмі важны і для музыкантаў, і для яго асабіста. "Я бачу, як яны зараджаюцца ад сумеснай творчасці, і гэта вельмі цудоўна. Ігра ў аркестры неверагодна збліжае музыкантаў, робіць іх адзіным арганізмам, і я ўпэўнены, што гэты вопыт надоўга запомніцца ўсім. Выдатна, што маладыя таленавітыя музыканты з Расіі і Беларусі аб'ядноўваюцца ў адзіны калектыў, каб спачатку правесці няпросты рэпетыцыйны перыяд, а потым выступіць з канцэртамі ў Маскве і Мінску. У наш няпросты час, калі вакол шмат канфліктаў, добра, што мастацтва, класічная музыка аб'ядноўвае моладзь. Значыць, у нас ёсць не проста будучыня, а будучыня, напоўненая творчасцю, прафесійнымі дасягненнямі і радасцю ад сумеснага пражывання на сцэне", - адзначыў маэстра.
У праграме канцэртаў - сюіта нумар 2 з балета "Рамэа і Джульета" Пракоф'ева, вальс з оперы "Дзікае паляванне караля Стаха" Солтана, дзве п'есы Хачатурана, канцэрт нумар 3 для фартэпіяна з аркестрам Рахманінава і інш. У Маскве салістам выступіць знакаміты піяніст, лаўрэат конкурсу Чайкоўскага Аляксей Мельнікаў, а ў Мінску - салістка Беларускай дзяржаўнай філармоніі Алена Навуменка. За дырыжорскім пультам будзе мастацкі кіраўнік аркестра Юрый Башмет.
Канцэрты Маладзёжнага беларуска-расійскага сімфанічнага аркестра ў Маскве і Мінску пройдуць пры падтрымцы Пастаяннага камітэта Саюзнай дзяржавы, міністэрстваў культуры Беларусі і Расіі.
версія для друку
зрабіць стартавай
дабавіць у выбранае