Падзеі, факты, анонсы

Лёс у пісьмах. Выстава "Вялікая княгіня Вольга Аляксандраўна" адкрылася ў Мірскім замку

Фота з архiва

27 сакавіка, Гродна /Кар. БЕЛТА/. Выстава "Вялікая княгіня Вольга Аляксандраўна. Усё жыццё як на палатне" - сумесны праект музея "Замкавы комплекс "Мір" і гісторыка-культурнага цэнтра "Палацавы комплекс Альдэнбургскіх" (Варонежская вобласць), упершыню экспануецца ў Беларусі, паведамілі карэспандэнту БЕЛТА ў замкавым комплексе.

У аснову выставы пакладзены пісьмы вялікай княгіні Вольгі Аляксандраўны да брата, імператара Мікалая II, і пляменніц, дзённікавыя запісы і мемуарная літаратура. Фатаграфіі з яе асабістага архіва, дзіцячыя малюнкі і карціны, створаныя ў наступныя гады, паштоўкі па малюнках Вольгі Аляксандраўны дазваляюць зірнуць на падзеі больш чым векавой даўнасці вачамі сучасніка.

Мірскі замак стаў пляцоўкай для гэтай экспазіцыі не выпадкова: члены імператарскай сям'і цесна ўзаемадзейнічалі з прадстаўнікамі роду князёў Святаполк-Мірскіх, апошніх уладальнікаў Мірскага замка. Унучатая пляменніца князя Мікалая Святаполк-Мірскага - Соф'я Арбеліяні была фрэйлінай і блізкай сяброўкай імператрыцы Аляксандры Фёдараўны, жонкі Мікалая II.

Княгіня Вольга Аляксандраўна была дабрачынцам шматлікіх школ, бальніц, курсаў, багадзельняў, таварыстваў. У Першую сусветную вайну яна стала простай сястрой міласэрнасці. З ранняга дзяцінства зацікавілася жывапісам і на працягу ўсяго жыцця не пераставала пісаць карціны. У эміграцыі княгіня прадаўжала сваю дабрачынную дзейнасць. Яе карціны выстаўляліся ў некалькіх еўрапейскіх сталіцах, а сродкі ад продажу ішлі на дапамогу рускім эмігрантам, якія апынуліся ў цяжкім матэрыяльным становішчы.

Часовую экспазіцыю ў Мірскім замку дапоўнілі арыгінальныя прадметы XIX - пачатку ХХ стагоддзяў з фондаў музея "Замкавы комплекс "Мір" і прыватнай калекцыі.

Выстава Палацавага комплексу Альдэнбургских "Вялікая княгіня Вольга Аляксандраўна. Усё жыццё як на палатне" прадоўжыцца па 2 мая.

версія для друку

зрабіць стартавай

дабавіць у выбранае