Падзеі, факты, анонсы

Конкурсы, выстаўкі, майстар-класы і шмат анімацыі. Фестываль "Анімаёўка" чакаюць у Магілёве

Фота з архiва

23 верасня, Магілёў /Кар. БЕЛТА/. XXVII Міжнародны фестываль анімацыйных фільмаў "Анімаёўка" пройдзе 25-27 верасня ў Магілёве. У яго праграме - конкурсы, выстаўкі, майстар-класы, творчыя сустрэчы і шмат аўтарскай анімацыі, расказалі карэспандэнту БЕЛТА на магілёўскім прадпрыемстве "Кінавідэапракат".

На "Анімаёўцы" традыцыйна пройдуць конкурсы анімацыйных фільмаў і дзіцячай анімацыйнай творчасці, а таксама дзіцячага выяўленчага мастацтва і дэкаратыўна-прыкладной творчасці. На фестываль былі заяўлены 317 фільмаў з 47 краін свету, упершыню свае работы прыслалі В'етнам і Трынідад і Табага. Нацыянальная кінастудыя "Беларусьфільм" прэзентуе два фільмы. У сваю чаргу, на конкурс дзіцячага выяўленчага мастацтва і дэкаратыўна-прыкладной творчасці заяўлена больш за 130 работ з Беларусі.

У выніку экспертная камісія адабрала 61 работу з 21 краіны на конкурс анімацыйных фільмаў і 69 фільмаў з 10 краін для ўдзелу ў конкурсе дзіцячай анімацыйнай творчасці. Пераможцаў чакаюць Гран-пры і дыпломы па намінацыях, якіх стала больш: у гэтым годзе журы таксама трэба будзе выбраць лепшы анімацыйны серыял.

У фестывальныя дні запланаваны паказы анімацыйных фільмаў, творчыя сустрэчы, майстар-класы, прэзентацыі, выстаўкі. Упершыню ў гісторыі фестывалю пройдзе серыя майстар-класаў па анімацыі з выкарыстаннем штучнага інтэлекту. Вынікі "Анімаёўкі" аб'явяць 27 верасня на ўрачыстым закрыцці мерапрыемства.

Гісторыя фестывалю пачалася ў 1998 годзе. За гады правядзення "Анімаёўка" стала значнай падзеяй у культурным жыцці рэгіёна і краіны. Год ад году статус мерапрыемства расце. Пацвярджэннем стаў той факт, што з 2024 года пераможцы фестывалю будуць атрымліваць дадатковыя балы пры паступленні ў Маскоўскі дзяржаўны інстытут культуры.

версія для друку

зрабіць стартавай

дабавіць у выбранае