Падзеі, факты, анонсы

Футбольная зборная Беларусі апусцілася на 98-е месца рэйтынгу ФІФА

Фота з архiва

28 лістапада, Мінск /Кар. БЕЛТА/. Зборная Беларусі апусцілася на адну пазіцыю ў абноўленым рэйтынгу Міжнароднай федэрацыі футбола (ФІФА), паведамляе карэспандэнт БЕЛТА.

За мінулы месяц беларускія футбалісты няўдала правялі два заключныя паядынкі ў групе С3 Лігі нацый УЕФА. Спачатку падапечныя Карласа Алоса прайгралі ў Белфасце камандзе Паўночнай Ірландыі (0:2), а затым у Сафіі згулялі ўнічыю з Балгарыяй (1:1). Цяпер у зборнай Беларусі 1226.61 бала і 98-е месца сярод 210 каманд. У суверэннай гісторыі вышэйшай пазіцыяй зборнай Беларусі ў рэйтынгу ФІФА было 36-е месца ў лютым 2011 года.

Топ-10 лістападаўскага рэйтынгу ФІФА:

1. Аргенціна - 1865.25 бала.
2. Францыя - 1859.78.
3. Іспанія - 1853.27.
4. Англія - ​​1813.81.
5. Бразілія - ​​1775.85.
6. Партугалія - ​​1756.12.
7. Нідэрланды - 1747.55.
8. Бельгія - 1740.62.
9. Італія - ​​1731.51.
10. Германія - 1703.79.

Наступны рэйтынг мужчынскіх зборных ФІФА абнародуе 12 снежня.

Жаночая зборная Беларусі цяпер знаходзіцца на 55-й пазіцыі ў сусветным рэйтынгу. Свае заключныя сустрэчы сёлетняга сезона беларускія футбалісткі правядуць 30 лістапада і 3 снежня ў Ташкенце супраць каманды Узбекістана, якая займае 48-ю пазіцыю ў рэйтынгу ФІФА. Спіс жаночых зборных узначальваюць футбалісткі ЗША, на другой пазіцыі Англія, трэцяе месца займае Іспанія, чацвёртай ідзе каманда Германіі, замыкае першую пяцёрку Швецыя. Апошні ў гэтым годзе жаночы рэйтынг будзе апублікаваны 20 снежня.

версія для друку

зрабіць стартавай

дабавіць у выбранае