Падзеі, факты, анонсы
Фестываль "Моладзь - за Саюзную дзяржаву" пройдзе ў Смаленску 5-9 верасня
Фота з архiва
4 верасня, Масква /Эдуард Півавар - БЕЛТА/. XVI фестываль "Моладзь - за Саюзную дзяржаву" пройдзе ў Смаленску 5-9 верасня, паведамілі БЕЛТА ў прэс-службе Парламенцкага сходу Саюза Беларусі і Расіі.
Урачыстае адкрыццё фестывалю, гала-канцэрт артыстаў і творчых калектываў Беларусі і Расіі адбудуцца 6 верасня. Дэпутаты Парламенцкага сходу прымуць удзел у асноўных мерапрыемствах маладзёжнага форуму.
"У праграме фестывалю запланаваны сустрэчы гасцей і ўдзельнікаў мерапрыемстваў з дэпутатамі Парламенцкага сходу, членамі Маладзёжнай палаты пры Парламенцкім сходзе, лідарамі маладзёжных арганізацый і рухаў, правядзенне патрыятычных акцый. Акрамя таго, у рамках фестывалю ўпершыню будуць адкрыты чатыры дыскусійныя пляцоўкі, на якіх адбудуцца сустрэчы ўдзельнікаў фестывалю з прадстаўнікамі патрыятычных рухаў, а таксама з вядомымі спартсменамі з Беларусі і Расіі", - расказалі ў прэс-службе.
Цэнтральнае мерапрыемства фестывалю "Моладзь - за Саюзную дзяржаву" - конкурс выканаўцаў маладзёжнай песні. Для ўдзелу ў ім у Смаленск прыедуць пачынаючыя спевакі з Бабруйска, Гомеля, Калінінграда, Краснадара, Мінска, Масквы, Арла, Оршы, Петразаводска, Санкт-Пецярбурга і іншых гарадоў Беларусі і Расіі. Выступленні канкурсантаў будзе ацэньваць прафесійнае журы, у склад якога ўваходзяць вядомыя артысты і музыканты з Беларусь і РФ. Пераможцы атрымаюць дыпломы і прызы ад Парламенцкага сходу Саюза Беларусі і Расіі.
Да правядзення фестывалю будзе прымеркавана пасяджэнне Камісіі Парламенцкага сходу па маладзёжнай палітыцы, спорце і турызме, якое адбудзецца ў Смаленску 7 верасня. Да ўдзелу ў мерапрыемстве запрошаны прадстаўнікі Пастаяннага камітэта Саюзнай дзяржавы, Міністэрства адукацыі Беларусі, Міністэрства асветы Расіі, Міністэрства навукі і вышэйшай адукацыі РФ, Федэральнага агенцтва па справах моладзі, Беларускага рэспубліканскага саюза моладзі, Міністэрства спорту і турызму Беларусі, Міністэрства спорту Расіі, Міністэрства эканамічнага развіцця РФ. Будуць абмяркоўвацца пытанні збліжэння заканадаўства Беларусі і Расіі ў сферах маладзёжнай палітыкі, турысцкай дзейнасці, фізічнай культуры і спорту.
"Фестываль "Моладзь - за Саюзную дзяржаву" - гэта эфектыўная сацыяльна-культурная пляцоўка для маладых людзей, якая садзейнічае збліжэнню моладзі Беларусі і Расіі, - падкрэслілі ў прэс-службе. - Фестываль праводзіцца па ініцыятыве дэпутатаў Парламенцкага сходу. Упершыню фестываль адбыўся ў Анапе ў 2006 годзе і быў прымеркаваны да 10-годдзя падпісання Дагавора аб утварэнні супольніцтва Беларусі і Расіі. З 2007 па 2019 год фестываль праводзіўся ў Растоўскай вобласці. З 2022 года фестываль праходзіць на тэрыторыі Смаленскай вобласці".
версія для друку
зрабіць стартавай
дабавіць у выбранае