Падзеі, факты, анонсы

Даследаванне па распаўсюджанасці COVID-інфекцыі сярод насельніцтва пройдзе ў Беларусі

Фота з архiва

29 студзеня, Мінск /Кар. БЕЛТА/. Сераэпідэміялагічнае даследаванне па распаўсюджанасці COVID-інфекцыі сярод насельніцтва пройдзе ў Беларусі, паведаміў журналістам каардынатар праграм СААЗ па інфекцыйных захворваннях краінавага офіса Сусветнай арганізацыі аховы здароўя ў Беларусі Вячаслаў Гранькоў, перадае карэспандэнт БЕЛТА.

"У бліжэйшы час у Беларусі пры падтрымцы Сусветнай арганізацыі аховы здароўя пройдзе значнае эпідэміялагічнае даследаванне, накіраванае на выяўленне працэнта насельніцтва, якое мае антыцелы ў крыві", - сказаў Вячаслаў Гранькоў.

Ён дадаў, што гэта даследаванне будзе праходзіць не за адзін раз, а на працягу некалькіх месяцаў. "Мы зможам паглядзець у дынаміцы, як змяняецца распаўсюджанасць інфекцыі сярод насельніцтва", - адзначыў ён.

Згодна з пратаколам сераэпідэміялагічнага даследавання, выбарка складае 5 тыс. чалавек: агульнае насельніцтва - больш за 4 тыс., асобная кагорта - медыцынскія работнікі. Мяркуецца, што набор удзельнікаў будзе праводзіцца ва ўсіх рэгіёнах. Вячаслаў Гранькоў падкрэсліў, што ўдзел добраахвотны, кожны чалавек будзе даваць інфармаваную згоду. "Будуць прадстаўлены людзі розных узростаў, таму што нам трэба зрабіць зрэз, найбольш набліжаны да структуры насельніцтва", - сказаў ён. За набор удзельнікаў даследавання адказныя ўстановы аховы здароўя па месцы жыхарства.

Стартуе даследаванне ў I квартале 2021 года. "Але гэта будзе доўгае даследаванне, каб паглядзець, якая распаўсюджанасць інфекцыі ў пэўны момант і як яна мяняецца з цягам часу, як ідзе распаўсюджванне інфекцыі", - адзначыў ён.

версія для друку

зрабіць стартавай

дабавіць у выбранае